"Ary dia milaza amin'ny Zanak'Isiraely hianao hoe: Ny Sabatako no tandremo; fa famantarana ho amiko, sy ho aminareo hatramin'ny taranakareo fara mandimby izany, mba ho fantatrareo fa Izaho no Jehovah Izay manamasina anareo." - Eks. 31:13.
Mofon’aina:
Nosoritan'ny Tompo mazava ny lalana mankany amin'ny tananan'Andriamanitra saingy novan'ilay rain'ny fihemorana ny takela-by mpanondro lalana ka nosoloany sandoka - ny sabata sandoka izany. Hoy izy: "Hanao asa manohitra an' Andriamanitra aho. Homeko fahefana ny solontenako, ilay lehilahin'ota, mba hanitsakitsaka ny tsangambato naorin'Andriamanitra, ny Sabata andro fahafito. Amin'izany no hanehoako amin'izao tontolo izao fa efa novana ny andro nohamasinin'Andriamanitra sy notahiny. Tsy ho velona ao an-tsain'ny vahoakan'Andriamanitra intsony io andro io fa hofafako ny fahatsiarovana azy. Andro iray tsy mitondra ny tombokasen' ny lanitra no hasoloko ny toerany, andro iray izay tsy azo atao famantarana amin'Andriamanitra sy ny vahoakany.
"Hotarihiko ny olona izay manaiky io andro io hanamasina izany eo amin'ny toeran'ny andro fahafito napetrak' Andriamanitra. Hanandratra ny tenako amin'ny alalan' izay manam-pahefana manarakaraka ahy aho. Hasandratra ny andro voalohany, ary horaisin'ny tontolo protestanta ho toy ny Sabata marina io sandoka io. Amin'ny alalan'ny tsy fitandremana ny Sabata naorin' Andriamanitra no hanehoako ny tsy fanajana ny Lalany. Hampiasaiko hanohanana ny sabatako ny teny hoe: famantarana ho amiko, sy ho aminareo hatramininy taranakareo fara mandimby izany.' Amin'izany no hahatonga an' izao tontolo izao ho ahy. Izaho no hanapaka amin'ny tany, ho andrianan'izao tontolo izao. Hofeheziko ny fisainan'ireo eo ambany fahefako ka hanjary zavatra fanao tsinontsinona ny Sabatan'i Jehovah." (...)
Napetrak' ilay lehilahin'ota ny sabata sandoka, ary efa nanaiky io zanaky ny fahefana papaly io ireo izay mitonona ho Kristianina ka manda tsy hankato an' Andriamanitra amin'izany. Tahaka izany no itarihan'i Satana ny lehilahy sy ny vehivavy ho amin'ny lalana mifanohitra amin'izay mankany amin'ilay tanana fialofana; ary ireo vahoaka marobe manaraka azy no maneho fa tsy i Adama sy i Eva irery no nanaiky ny tenin'ilay fahavalo fetsy.
Navadik'ilay fahavalo ny takela-by mpanondro lalana mba haneho ny lalan'ny tsy fankatoavana ho toy ny lalan'ny fahasambarana. - SDABC, b. 4, tt. 1171, 1172.