"Ary ny mpanapaka ny synagoga dia tezitra, satria Jesosy nahasitrana tamin'ny Sabata, dia namaly ka nanao tamin 'ny vahoaka hoe: Henemana no azo anaovan-draharaha; koa avia hositranina amin'izany, fa tsy amin 'ny andro Sabata." - Lio. 13:14.
Mofon’aina:
Ary nampianatra tao amin'ny synagoga anankiray Jesosy tamin'ny Sabata. Ary, indro, nisy vehivavy izay nanana fanahy mahafarofy valo ambin'ny folo taona, ary nanjoko izy ka tsy nahatraka akory. Ary rehefa nahita azy Jesosy, dia niantso azy ka nanao taminy hoe: Ravehivavy, afaka amin'ny rofinao hianao. Dia nametraka ny tanany taminy Izy; ary niaraka tamin' izay dia nitraka ravehivavy sady nankalaza an 'Andriamanitra ." - Lio. 13:10-13.
Nanohina ilay fon'i Kristy be fangorahana ny nahita an' ity vehivavy nijaly ity, ary azo heverina fa ny olombelona rehetra izay nijery azy dia ho nifaly tamin'ny nanapahana ny fatorany sy ny nanasitranana azy tamin'ny fahoriana izay nampiondrika azy nandritra ny valo ambin'ny folo taona. Tsikaritr'i Jesosy teo amin'ny endrika maloka sy feno fahatezeran' ireo mpisorona sy raby kosa fa tsy mba nahatsapa fifaliana noho ny nanafahana an-dravehivavy izy ireo. (...) Tsy nahatsapa fankasitrahana izy ireo raha nanjary nahitsy tsara ny vatan-dravehivavy izay niova bika teo, ary koa raha nampifaly ny fon-dravehivavy ny Fanahy Masina mandra-pipololotran' ny fisaorana avy tao ka nahatonga azy nanome voninahitra an' Andriamanitra.
Hoy ny mpanao Salamo: "Izay manatitra fanati-pisaorana no manome voninahitra Ahy." - Sal. 50:23a. Nisy feo hafa naningana anefa teo anivon'ireo teny feno fankasitrahana. "Ary ny mpanapaka ny synagoga dia tezitra, satria Jesosy nahasitrana tamin'ny Sabata." - Lio. 13:14a. (...)
Raha tena nihaino ny feon'ny fieritreretany mahakasika ny fitan-dremana ny Sabata araka ny tokony ho izy anefa io lehilahy io, dia ho hainy ny nanavaka ny toetry ny asa nataon'i Kristy. (...) Nifandrindra tamin'ny fanamasinana ny andro Sabata mantsy izany. Talanjona sy faly teo anatrehan'izay natao tamin'ity vehivavy nijaly ity ny olona tetsy sy teroa; tao ireo voakasika am-po sy ireo izay nahazo fahazavan-tsaina, izay ho nanjary mpianatr'i Kristy raha tsy teo ny endrika maloka sy feno fahatezeran' ireo raby. - ST, 23 Avrily 1896.