"Ny fahitsian'ny mahitsy no mitarika azy; fa ny faharatsian'ny mpivadika mahatonga fandringanana amin'ny tenany." - Ohab. 11:3.
Mofon’aina:
Hoy i Kristy: "Ny hazo tsara tsy mety mamoa voa ratsy, ary ny hazo ratsy tsy mety mamoa voa tsara." - Mat. 7:18. "Ka dia ny voany no hahafantaranareo azy." - and. 20. Ny asa miseho eo amin'ny fiainan'ny olona no voa entiny. Raha toa izy ireo tsy mahatoky sy tsy manana fahitsiana eo amin'ny " raharaha eto an-tany, dia (...) haneho tsy fahatokiana izy eo amin'ny fiainana ara-pivavahana ary handroba an'Andriamanitra amin'ny fanatitra sy ny ampahafolony".
Melohin'ny Baiboly amin'ny fomba hentitra indrindra ny lainga sy ny famitahana ary ny tsy fahatokiana. Efa ambara amintsika mazava ny marina sy ny diso. (...) Heverina ho tsy dia fahotana be loatra ny fialana kely amin'ny fahamarinana, ny fiovana kely amin'ny fitakian'Andriamanitra, raha miresaka momba ny fahazoana tombony na ny fatiantoka ara-bola. Rehefa fahotana dia fahotana, na ataon'ny mpanam-bola an-tapitrisany izany na ataon'ny mpangataka eny amoron-dalana. Mahatonga fanamelohana ho an'ny fanahiny ireo izay mihary fananana amin'ny alalan'ny fisolokiana. Izay rehetra azo amin'ny hafetsena sy ny fitaka dia ozona ho an'ny mandray azy.
Nizaka ny vokatry mahatsiravin'ny fandikana ny baiko mazava nomen'Andriamanitra i Adama sy i Eva. Izao angamba no tao an-tsain'izy ireo: fahotana bitika ity ka tsy hampaninona. Faharatsiana lehibe anefa no nandraisan'Andriamanitra izany, ary hiitatra hatrany amin'ny taona rehetra mifandimby ny loza nateraky ny fandikany lalàna. Amin' izao androntsika izao, dia halatra sy hosoka isan-karazany no hita eo amin'ny sehatry ny fandraharahana, ary ireo mitonona ho vahoakan'Andriamanitra no manao izany ka miantso ny faninian'Andriamanitra sy mahatonga fahafaham-baraka amin'ny Asany. (...)
Mahatonga ny olona hanana fahazarana manao ratsy ny fampanaranam-po mitohy ny fahotana (...). Raha mandinika amim-pahatokiana ny Tenin'Andriamanitra ireo rehetra milaza fa mino ny fahamarinana, dia hitombo fa tsy ho zeny eo amin'ny ara-panahy. Ireo izay manao tsinontsinona ny fitakian'Andriamanitra eto amin' izao fiainana izao dia tsy hanaja ny Fahefany raha toa tonga any an-danitra. - TFC, b. 4, tt. 311,312.