"Iza no namatra ny rano teo am-pelatanany, ary nanjehy ny lanitra tamin'ny zehiny, sy namory ny vovo-tany tamin'ny vata, ary nandanja ny tendrombohitra tamin'ny fandanjana sy ny havoana tamin'ny mizana?" Isa. 40:12.
Mofon’aina:
Hoy ny mpanao Salamo: "Ny lanitra mitory ny voninahitr ' Andriamanitra; ary ny habakabaka manambara ny asan'ny tànany. Ny andro samy miteny amin'ny andro mandimby azy, ary ny alina samy manolo-pahalalana amin'ny aiina mandimby azy. Tsy misy teny na fiteny anefa; tsy re izay feony." - Sal. 19:1-3. Mihevitra ny olona sasany fa ireny zavatra lehibe eo amin'ny natiora ireny no Andriamanitra. Tsy Andriamanitra ireny zava-mahatalanjona eny amin'ny lanitra ireny fa manao fotsiny ny asa asaina ataony. (...) Andriamanitra no mpanara-maso ary koa Mpamorona ny zavatra rehetra. (...) Ny tanana izay mihazona ny tendrombohitra sy mampifandanja azy amin'ny toerany no mitondra an'izao tontolo izao amin'ny fihodinany eo amin'ny masoandro (...).
Tsy misy mihitsy hetsika ataon'ny natiora ka tsy hitantsika ao amin'ny Tenin'Andriamanitra. Izany dia manambara fa "Izy mampiposaka ny masoandrony" ary mampilatsaka ny ranon'orana. Izy no "mampaniry ahitra ny tendrombohitra (...) Mandatsaka oram-panala tahaka ny landihazo Izy; mampiely fanala tahaka ny lavenona Izy. Mandatsaka ny havandrany tahaka ny sombintsombin-javatra Izy (...) Mamoaka ny teniny Izy ka mampiempo ireny; mampifofofofo ny rivony Izy, dia mandriaka ny rano." (...) (Mat. 5:45; Sal. 147:16-18)
Asehon'ireo tenin'ny Soratra Masina ireo fa tsy misy lalàna mahaleo tena eo amin'ny zavaboary. Manome ny zavatra ilaina sy ny fitaovana hanatanterahana ny planiny Andriamanitra. (...) Nalefany ny ranon'ando, ny orana sy ny masoandro mba hahatonga ny zava-maitso hiroborobo sy hamelatra ny karipetrany manerana ny tany, mba hahatonga ny hazo madinika sy ny hazo fihinam-boa hitsiry sy hamelana ary hamoa
Diso ny fiheverana fa misy lalàna apetraka mba hiasan'ny voa amin'ny tenany; na koa hoe mipoitra ny ravina satria ny herin'ny tenany ihany no anaovany izany. Andriamanitra dia manana ny lalàna izay efa napetrany, saingy fitaovana ampiasainy mba hampisy vokatra ihany ireny. (...). —RH, 17 Marsa 1904.