"Aoka hidera ny anaran’i Jehovah ireo; fa Izy no nandidy, dia ary ireo. Nampitoetra ireo ho mandrakizay doria Izy; Nomen-dalàna ireo ka tsy mba mihoatra." — Sal. 148:5,6.
Mofon’aina:
Kanto tokoa ny filazalazan'ny mpanao Salamo ny fikarakaran' driamanitra ny zavaboary any an'ala: "Ny tendrombohitra avo dia ho an 'ny osi-dia; Ny harambato no fiarovana ho an 'ny hyraka." — Sal. 104:18. Nandefa ny loharano hamakivaky ny havoana Izy, mba hanorenan'ny vorona ny akaniny ka "rantsan-kazo no anenoany" — and. 12. Ireo zavaboary any an'ala rehetra sy ny havoana dia anisan'ny ankohonany. Manokatra ny tanany Izy ka "mahavoky soa ny zava-miaina rehetra." — Sal. 145:16. - Ed, t. 118.
Matetika ireo voromahery any an-tendrombohitr'i Alpa no atosiky ny tafio-drivo-mahery ho any an-tsefatsefaky ny tendrombohitra. Manodidina io vorona mahery io ny rahona matevina ka tsy hitany ny toerana avo tratry ny masoandro izay nanorenany ny akaniny. Toa very maina ny ezaka rehetra ataony ialana amin' ireo rahona ireo. Mivezivezy izy, mikopakopaka elatra araka izay tratry ny heriny, ary manakoako any an-tendrombohitra ny hiakany. Rehefa ela ny ela anefa dia amin-kery no hiakarany, manivatsiva ny rahona, ka tonga indray any amin'ny hazavan'ny masoandro, mamela ny haizina sy ny tafiotra any aoriany.
Mety manodidina antsika ny toe-java-tsarotra sy ny hakiviana ary ny haizina; ary mangeja antsika ny lainga sy ny loza, ary ny tsy rariny. Misy ireo rahona tsy mety misava; mitolona mafy amin'ny toe-javatra isika; tokana ihany ny lalana hahafahana mandresy izany rehetra izany. Mijanona eto amin'ny tany ny zavona, any ankoatra ny rahona kosa dia mamirapiratra ny fahazavana avy amin'Andriamanitra. Azontsika atao ny miakatra ho amin'ny fahazavan'ny Fanatrehany eo amin'ny elatry ny finoana.
Maro ireo lesona izay tokony hianarana. Mampianatra antsika hanana toky ny hazo maniry irery eny amin'ny havoana na tendrombohitra; mamaka lalina ao amin'ny tany izy, ary mahajoro eo anatrehan'ny tafiotra mahery. Ny vatan-kazo nifamatotra sy niolikolika fony izy mbola hazo tanora, izay tsy hain'ny hery ety an-tany hovana amin'ny endrika mahitsy dia mampiseho antsika ny fiantraikan'ny hery miasa mangina voalohany. (...). — Fk, t. 129.