"Mitsangàna, mihazavà, fa tonga ny fahazavanao, ary ny voninahitr’i Jehovah efa miposaka aminao. Fa, indro, ny aizina manarona ny tany, ary ny aizim-pito manarona ny firenena; fa aminao kosa no iposahan’i Jehovah, ary aminao no isehoan'ny voninahiny." - Isa. 60:1,2.
Mofon’aina:
Nandany alina manontolo nivavahana tamin'ny Rainy ny Mpanavotra antsika, ary ny vavaka indrindra no fototra nanorenana ny fiangonana kristianina sy ny hetsika misiônera. Niray saina sy toerana ny mpianatra, nitalaho tamin'ny Tompo mba hirotsahan'ny Fanahy Masina amin'izy ireo.
Na efa mirotsaka mitafotafo amin' ny alalan'ny fantsona maro isan-karazany aza ny Fanahy Masina, dia arakaraka ny itadiavantsika Azy no hahabetsaka ny fatrany. Araka izany, raha miasa - amin-kafanam-po ho famonjem-panahy isika, dia ho voatarika mandrakariva hanavao ny fangatahantsika eo amin' ilay Loharanon'ny hery rehetra; ary toy izany no isian'ny fifandraisan'ny fanahy tsy tapaka amin'Andriamanitra. Manovo mandrakariva ao amin'ny ranon'aina ny finoana, ary tsy mety titra na oviana na oviana izany. (...)
Tena mila fahendrena avy any an-danitra isika! Tsy efa nampanantenaina antsika ve izany? "Ary raha misy hianareo tsy manam-pahendrena, aoka izy hangataka amin 'Andriamanitra, Izay manome malalaka ho an 'ny olona rehetra sady tsy mandatsa; ary dia homena azy izany. Nefa aoka hangataka amin 'ny finoana izy ka tsy hiahanahana akory; fa izay miahanahana dia toy ny alon-dranomasina entin'ny rivotra ka atopatopany. Fa aoka tsy hanampo handray zavatra amin 'ny Tompo izany olona izany" – Jak. 1:5-8. Fanomezan-toky manao ahoana re izany! Feno sy mahafaoka be! (...) Tian'ny Tompo hanatona Azy amin-toky sy finoana tanteraka isika, hahazo antoka ny Teniny fa hotanterahiny tokoa izay nolazainy.
Raha mba tsapantsika mantsy ny maha-zava-dehibe ny fanabeazana ny mambra tsirairain'ny fiangonana mba hanao zavatra! Tokony ho tsapantsika tsirairay avy ny adidy lehibe amin'ny maha-Kristianina, amin'ny fampiasana ny fananana sy ny fahaizana rehetra nankinin'Andriamanitra tamintsika, ka hanao izay fara herintsika isika ho fanatanterahana ny asa izay andras an ' ny Tompo hataontsika. (...)
Mila finoana bebe kokoa isika, ary mita hamasinina ny fahaiza-manaontsika. Ambony sy mendrika ny tanjona eo anoloantsika. Tsy manana fotoana na teny holanina foana amin'ny adilahy isika. (...) Mila hamasinina ny herintsika. TSA, U. 43,44.