"Mba hialanareo ny toetrareo taloha araka ny fitondrantenanareo fahiny, izay mihasimba araka ny flan 'ny fitaka. " - Efes. 4:22.
Mofon’aina:
Miantso anao hibebaka Andriamanitra ankehitriny, ary hafana fo amin'ny asa. Ny fahasambaranao mandrakizay dia voafaritry ny fiainana izay arahinao ankehitriny. Holavinao ve ny fanasan ' ny famindram po natolotra anao ka hisafidy ny lalanao manokana ianao? Hankasitraka fireharehana sy zava-poana ve ianao ka hanary ny fanahinao amin'ny farany? Ny Tenin'Andriamanitra dia milaza mazava amintsika fa vitsy no ho voavonjy, ary maro na dia amin'ireo izay nantsoina aza no ho hita miharihary fa tsy mendrika ny fiainana mandrakizay. Tsy hanana anjara any an-danitra izy ireo, fa handray ny anjara avy amin'i Satana, dia ny fahafatesana faharoa.
Azon'ny lehilahy sy ny vehivavy ialana izany loza izany raha tiany. Marina fa i Satana no fototra niavian'ny ota; nefa izany tsy manala tsiny na iza na iza noho ny fahotana, satria tsy misy olona azon' i Satana terena hanao ratsy. Alainy fanahy izy ireo mba hanota, ary ataony izay anehoana fa manintona sy mahafinaritra ny fahotana; nefa miankina amin'ny sitrapon'ny olona ihany ny hanota na tsia. (...)
Tsy dia ankamamian'ny maro ny fiovam-po. Tsy zavatra kely mantsy ny hanova ny fisainana araka ny tany sy tia fahotana ka hamily azy hahatakatra ny fitiavan'i Kristy tsy hay lazaina, (...) mba ho ampoky ny fitiavan'ny lanitra ny fanahy ka ho voasinton'ny zava-miafin'ny lanitra. Rehefa takany izany dia haharikoriko azy sy ho halany ny fiainany taloha. Hankahala ny fahotana izy, ary hamboraka ny fony eo anatrehan'Andriamanitra; handray an'i Kristy ho fiainana sy fifalian'ny fanahy izy. Hanohitra ny fahafinaretany tany aloha izy. Fisainana vaovao (...) no hiainany; ka na ny fahoriany, na ny faniriany, na ny fitiavany dia vaovao avokoa. Ny filan'ny nofo, sy ny filan'ny maso, ary ny rehaky ny fiainana, izay nankasitrahana tany alohan' i Kristy dia miova ankehitriny ka Kristy indray no tsiron'ny fiainany sy satroboninahitry ny fifaliany. (..;) — TFC, b. 2, tt. 293,294.