"Nefa tsy ho an 'ireto ihany no angatahako, fa ho an 'izay mino Ahy koa noho ny teniny." — Jao. 17:20.
Mofon’aina:
Alao sary an-tsaina i Kristy, Ilay iankohofan'ny anjely, mitalaho amim-bavaka. Nahery nivavaka Izy, nangataka fanampim-pahasoavana hatrany avy eo an-tanan'ny Ray, ary nahazo hery sy famelombelomana nahafahany nampianatra lesona momba ny toky sy ny fanantenana. Indro Izy mandohalika, mandoatra ny fanahiny eo anatrehan'ny Ray, eo ambanin'ny tara-pahazavan' ny volana. Indreo ny anjely manara-maso Ilay mpivavaka marina amin' Andriamanitra. Misandratra any an-danitra ho antsika ny vavaka ataony.
Matetika ny mpianatra no nahita an'i Kristy nandohalika nivavaka tamin'ny fo torotoro sy mietry. Ary rehefa nitsangana avy teo am-pandohalehana ny Tompo, inona no hitan'izy ireo teo amin'ny endriny sy ny fihetsiny? Fahavononana hanatanteraka ny adidy sy hiatrika ny fitsapana. Nilain'ny maha olombelona Azy ny vavaka. Mazàna no narahim-pitarainana mafy sy fahoriam-panahy lalina ny fangatahany teo am-pahitana ny tsy fahampian'ny mpianany, izay matetika hazan'ny fakam-panahin' i Satana noho ny tsy fahafantarana ny loza mandindona azy, ka voataona hiala amin'ny lalan'ny adidy ho amin'ny lalan-diso.
Madio tsy nisy pentina ny fiainan'i Jesosy. Tsy nanaiky ho lavon'ny fakam-panahin'ny fahavalo Izy. Raha sanatria lavo tamin'ny iray monja Izy, dia ho very ny taranak'olombelona. Tsy misy mahazo an-tsaina ny fijalian'i Kristy eo am-pahitana an'i Satana mampidi-doza ny fanahin'ireo izay mitonona ho mpianany, sy eo am-pahitana ireto farany milefitra tsikelikely mandra-pirodan'ny mandan'ny fanahiny! Ho Azy dia mihoatra lavitra noho izao tontolo izao ny fanahy iray very na avela ho eo ambany vahohon'i Satana (...). Mahery indrindra ity vavaka ity: "Mba ho iray ihany izy rehetra, tahaka Anao Ray ato amiko, ary Izaho koa ao aminao, mba ho ao amintsika koa izy; mba hinoan 'izao tontolo izao fa Hianao no naniraka Ahy. Ary nomeko azy ny voninahitra izay nomenao Ahy, mba ho iray izy, tahaka ny mahiray Antsika." — Jao. 17:21,22 - Ms, 9. 1906.
Aseho ho mpikatsaka sy mpitady ny ondry very i Jesosy. Ny fitiavany no manodidina antsika, mamerina antsika ho ao am-bala, ary manome tombontsoa antsika, dia ny fiarahana mipetraka Aminy any an-danitra. - Ms, 139, 1898.