Hidera Anao ny firenena Andriamanitra ô; eny, hidera Anao ny firenena rehetra.» - Sal. 67:3.
Mofon’aina:
Amin'ny maha Kristianina antsika, dia tokony hidera an'Andriamanitra mihoatra noho izao ataontsika izao isika. Tokony hiseho bebe kokoa eo amin'ny fiainantsika ny famirapiratan'ny fitiavany. Rehefa mijery an'i Jesosy amin'ny finoana isika, dia hita taratra eo amin'ny endritsika ny fifaliany sy ny fiadanany. (. ..) Rehefa velombelomin'ny Fanahy Masina ny fanahintsika, dia hisy fiantraikany tsara amin'ny hafa izay tsy mahalala ny fifaliana avy amin'ny fanatrehan'i Kristy izany. – SDABC, b. 3, t. 1148.
Tsy tian'ny Tompo ho olona malahelo lava ny vahoakany. Tiany hibebaka amin'ny fahotany izy ireo, mba hahafahany misitraka ny atao hoe fahafahan'ny zanak'Andriamanitra. Amin' izay dia ho feno fiderana an'Andriamanitra izy ireo, ary ho fitahiana ho an'ny hafa.
Nohosorana koa ny Tompo Jesosy mba "Hanolotra ho an 'ny malahelo ao Ziona, eny, hanome azy hamama ho solon 'ny lavenona, sy diloilo fifaliana ho solon'ny fahalahelovana, ary fitafiana fiderana ho solonsny fanahy reradreraka, mba hanaovana azy hoe Hazon'ny fahamarinana, nambolen'i Jehovah ho fampisehoam-boninahitra. " – Isa. 61:3.
Ny hanome voninahitra an'i Kristy; enga anie izany no ho tanjon'ny fiainantsika! Koa mila tandremantsika na ny endrika asehontsika, na ny fitenintsika, eny, na ny lantom-peontsika eo am-pitenenana aza. SDABC, b. 4, tt. 1153,1154.
Ny hira fiderana no rivo-piainan'ny lanitra; ary rehefa mikasika ny tany ny lanitra, dia misy hira sy feon-kira — "ny fisaorana, sy ny feo fiderana" – Isa. 51:3. (...) Aoka hisy hirahira ao an-trano, hira mahafinaritra sy madio, dia hihena ny teny henjana ary hitombo ny fifaliana sy ny fanantenana. (...)
Rehefa entin'ny Mpamonjintsika eo an-tokonan'ny mandrakizay isika ka feno ny voninahitr'Andriamanitra, dia afaka mahazo an-tsaina ireo hira fiderana sy fisaorana ataon'ny antoko mpihiran'ny lanitra izay manodidina ny seza fiandrianana; rehefa tonga ao amin'ny tokantranontsika eto an-tany ny akon'ny hiran'ireo anjely, dia ho voataona hanakaiky kokoa ireo mpihiran'ny lanitra ny fon'ny maro. Manomboka ety an-tany ny firaisana amin'ny lanitra. Eto isika no mianatra ny feo fiderana ataon'ny anjely. – YI, 29 Marsa 1904.