January 2025

Noho ny halehiben'ny famindrampony sy ny fanelanelanana ataony dia mahita fifaliana Andriamanitra na dia amin'ny fihetsika tsara bitika indrindra asetrintsika ny fitiavany aza. Azo isaina ho marina sy ho isan'ny malalan’Andriamanitra, izay honina miaraka Aminy mandrakizay ao amin'ny fitiavana tanteraka, ny tsirairay avy amintsika, amin'ny alalan'llay hany mendrika ny hotiavina sy tanteraka amin'ny fahamarinana. lo no fanantenana lehibe hahazoana fanavotana, ny asa ataon'i Kristy ho antsika any an-danitra.

Ahoana no mety hahatonga antsika, izay olona lavo sy mpanota, hankasitrahan'Andriamanitra Izay masina?

Vakio ny Rôm. 8:1 sy ny Rôm. 5:8. Inona no ampianarin'ireo andininy ireo antsika momba ny toerana misy antsika eo imason'Andriamanitra.

Ahoana no mety hiravoravoan Andriamanitra amin'izay olombelona vovoka sy mandalo, monina eo amina planeta bitika iray eo anivon'ny tontolo lehibe iray izay heverina ho midadasika tsy misy fetra? Ahoana no mahatonga ny olombelona hanana tombam-bidy lehibe toy izany eo imason'llay Avo Indrindra, Tsitoha, Izay tsy ory na inona na inona? Lafiny roa no azo anazavana ireo fanontaniana ireo. Voalohany, amin'ny fomba ahoana no ahazoana mampifaly an'Andriamanitra? Faharoa, amin'ny fomba ahoana no ahafahan'ny olombelona mitondra fifaliana ho an'Andriamanitra, kanefa mpanota isika?

Tsy hay tombanana ny hasarobidintsika tsirairay eo imason’Andriamanitra, na dia sarotra amintsika aza ny mahazo an-tsaina izany. Izany no mahatonga Azy ho ravoravo ny amin'ny fanahy voavonjy, na iray monja aza.

Vakio ny Zef. 3:17. Ahoana no hanazavan'io andininy io ilay fanoharana momba ny zanaka adala?

Araka ny efa hitantsika tamin'ny lesona teo aloha dia tsy misy olona na iray aza, na mpanota sy mpanao ratsy toy inona aza, ka tsy tian'Andriamanitra.

Vakio ny Lio. 15:11-32. Inona no ambaran'ny fanoharana momba ny zanaka adala ny amin'ny fangorahan'Andriamanitra sy ny fitiavany? Inona ny fampitandremana omen'izany ho an'ireo izay mitoetra ao an-tokantrano, tahaka llay zanaka anankiray ao amin'ny fanoharana?

Hodinihina mandritra ny herinandro: Lio. 15:11-32; Zef. 3:17; Efes. 5:25-28; Isa. 43:4; Rom. 8:1; Rom. 5:8; Mar. 9:17-29.

Tsianjery:

"Jehôvah Andriamanitrao no ao aminao, mahery Izy ka hamonjy; hiravoravo anao amin'ny fifaliana Izy; ho sondriana amin'ny fitiavany Izy: hifaly anao amin'ny fihobiana Izy." - Zef. 3:17.