Vakio ny Sal. 42:1-3; Sal. 63:1; Sal. 69:1-3 ary ny Sal. 102:1-7. Inona no miteraka alahelo be ho an'ilay mpanao Salamo?
Tsy ny fahoriana manokana sy izay iraisan'ny maro ihany no mampahory ilay mpanao Salamo fa ny toa tsy firaihan'Andriamanitra eo anatrehan'ny toe- javatra atrehin'ny mpanompony. Tahaka ny hetaheta lalina any amin'ny tany maina no fahatsapany ny tsy fanatrehan'Andriamanitra (Sal. 42:1-3; Sal. 63:1) ary koa fanaintainana mahafaty (Sal. 102:2-4). Mahatsapa ho toy ny tafasaraka amin'Andriamanitra ilay mpanao Salamo ary mampitaha ny tenany amin'ny vorona manirery. "Tahaka ny sama any an-efitra aho, Ary tahaka ny vorondolo any an-tananaolo. Tsy mahita tory aho sady tahaka ny tsikirity irery eo an- tampontrano." - Sal. 102:6, 7.
Manipika ny fahatsapana ho tafasaraka amin'Andriamanitra ny firesahana momba ny tany efitra. Ny vorona "irery eo an-tampontrano" dia tsy ao amin'ny akaniny izay toerana fitsaharany. Mitalaho amin'Andriamanitra "tao amin'ny lalina" ilay mpanao Salamo, toy ny atelin'ny rano lalina sy milentika ao anatin'ny "fotaka mandrevo" izy (Sal. 69:1-3; Sal. 130:1). Maneho toe-javatra mampahory izay tsy ahafahana mandositra ireo sary ireo, ka tsy misy vahaolana afa-tsy ny fidiran'Andriamanitra an-tsehatra.
Vakio ny Sal. 10:12; Sal. 22:1; Sal. 27:9 ary ny Sal. 39:12. Ahoana no asetrin'ny mpanao Salamo ny toa tsy fanatrehan'Andriamanitra?
Tsara ny manamarika fa nanapa-kevitra ny tsy hangina teo anatrehan'ny fanginan'Andriamanitra ireo mpanao Salamo. Tsy azo nohozongozonina ny finoan'izy ireo ny vavaka, satria miantefa amin'ilay Andriamanitra velona sy be fahasoavana izany. Mbola eo Andriamanitra, na dia toa tsy tsapa aza ny fanatrehany. Mbola Ilay Andriamanitra izay nandre tamin'ny lasa ihany Izy; izany no mahatonga ireo mpanao Salamo matoky fa mandre azy ireo Izy ankehitriny.
Nahatonga ireo mpanao Salamo nandini-tena sy nikatsaka an'Andriamanitra tamin'ny fiaikena sy ny fangatahana feno fanetren-tena ny fotoana nanginan' Andriamanitra. Fantatr'izy ireo fa tsy hangina mandrakizay Andriamanitra. Asehon'ny Salamo fa tsy maintsy tohizana ny fifandraisana amin'Andriamanitra na inona na inona toe-javatra mitranga eo amin'ny fiainana.
Inona ny lesona azontsika sintonina avy amin'ny zavatra nataon'ny mpanao Salamo teo anatrehan'izay toa fanginan'Andriamanitra? Ahoana no ataonao eo anatrehan'ny fotoana izay ahatsapanuo fa toa mangina Andriamanitra? Inona no mihazona ny finoanao ho veiona?