Vakio ny Ohab. 23:23; Jao. 8:32 ary ny Jao. 17:17. Inona no iraisan'ireo andalan-teny ireo?
Ady ifanaovan'ny fahamarinana sy ny sandoka ny fifanandrinana lehibe teo amin'ny tantara hatrizay. Mpandainga i Satana ary rain'ny lainga (Jao. 8:44). I Jesôsy kosa no tompon'ny fahamarinana rehetra; hoy Izy: "Izaho no lalana sy fahamarinana ary fiainana." - Jao. 14:6. Ao amin'ny tenin'Andriamanitra no misy ny fahamarinana izay manafaka antsika amin'ireo famitahan'i Satana. Ny Baiboly no manala sarona ireo fitak'i Satana ary mampahafantatra ny drafitr'Andriamanitra. Ny Soratra Masina no fanilon'ny tongontsika (Sal. 119:105). Izao no ambaran'ny mpanao Salamo: "Mahazava ny famoahana ny hevitry ny teninao ka manome fahalalana ho an'ny kely saina."- Sal.119:130. Ary ampiany izao teny izao izany: "Fahamarinana no tontalin-kevitry ny teninao"- Sal. 119:160.
Vakio ny 2 Pet. 1:16-21. Inona ny toky omen'ny apôstôly antsika mahakasika ny faminaniana? Inona ny sary an'ohatra ampiasainy mba honehoana ny lanjan'ny teny faminanian'Andriamanitra?
Tsy nanaraka ireo "anganongano noforonin'ny hafetsen'ny saina" isika. Manazava ny lalana haleha ireo faminaniana ao amin'ny Tenin’Andriamanitra. Manampy antsika hanavaka ny marina amin'ny diso ireny. Raha tsy eo ny Baiboly, dia hatambolimbolin'ny fihevitr'olombelona isika ary ho mora voafitaka. "Ny vahoakan'Andriamanitra dia tarihina ho eo amin' ny Soratra Masina izay fiarovana ho azy amin'ny fitaomana mangina avy amin'ny mpampianatra sandoka sy ny hery mamitaka ampiasain'ny fanahin’ny fahamaizinana. Mampiasa izay fitaka rehetra azony atao i Satana mba hisakanana ny olona tsy hahalala ny Baiboly, izay manambara mazava ny fitaka ataony. (...) Efa mananontanona ilay fitaka farany lehibe. Efa hanao ny asany mahagaga eo imasontsika ny antikristy. Hifanahaka akaiky indrindra amin'ny tena izy ny hala-tahaka ka tsy ho hay ny hanavaka azy raha tsy amin'ny alalan'ny Soratra Masina ihany. (…) Tsy misy afa-tsy ireo izay nampahatanjaka ny sainy tamin' ny fahamarinan'ny Baiboly no ho afaka hijoro mandritra ny ady lehibe farany. Ho tonga amin'ny fanahy tsirairay ilay fisedrana hamantarany ny tena toetrany hoe: Andriamanitra ve no hankatoaviko mihoatra noho ny olona? Efa madiva hipaika ankehitriny ilay ora hanapahana izay ho anjaran'ny tsirairay. Moa ve tafatoetra eo amin'ny vatolampin'ny tenin’Andriamanitra tsy miova ny tongotsika? Moa vonona va isika hijoro tsy ho azo hozongozonina hiaro ny didin'Andriamanitra sy ny finoana an'i Jesôsy ?" - HM, t. 619.
Saintsaino ireo fanontaniana ao amin'ny teny voalaza etsy ambony. Ahoana no hahafahantsika mijoro ao anatin'ireo toe-java-tsarotra farany? Inona no manelingelina antsika tsy handinika ny tenin'Andriamanitra? Ahoana no mety anaovantsika sorona ny fahamarinana noho ny fanomezantsika fahafaham-po ny tenantsika manokana?