Iray amin'ireo tantara mampahery indrindra ao amin'ny Baiboly, momba ny "asa fanompoana mifandraika amin'ny kolontsaina maro" no hita ao amin'ny bokin'i Estera. Betsaka ny zavatra nosoratana an'arivo taona momba io boky io, ary hatramin'izao fotoana izao aza dia Jiosy maro no mankalaza ny fetin'ny "Pourim" izay mifototra amin'ny Est. 9:26-31.
Jiosy nonina tao Sosana renivohitry ny fanjakana persianina i Estera sy i Môrdekay dadatoany. Noho ny antony manokana dia nijanona niaraka tamin'ireo Jiosy sasany tao amin'ny firenena nitanana azy ho babo izy ireo, fa tsy niverina tany amin'ny tanin'i Joda tahaka ireo Jiosy hafa.
Dia tonga mpanjakavavy i Estera rehefa nandalo toe-javatra maro izay nitantanan'Andriamanitra azy. "Ary tian'ny mpanjaka mihoatra noho ny vehivavy rehetra Estera, ka nahita fitia sy sitraka teo imasony mihoatra noho ny virijina rehetra izy, ka dia nosatrohany ny satroboninahitry ny fanjakana izy ka nampanjakainy hisolo an'i Vasty."- Est. 2:17.
Tamin'izany anjara toerana izany no nahafahan'i Estera nitana andraikitra lehibe teo amin'ny tantara ara-Baiboly, na dia tsy araka ny sitrapony loatra aza izany. Amin'ny fomba miavaka no anehoan'io tantara io fa afaka mijoro ho vavolombelon'ny fahamarinana ny vahoakan' Andriamanitra na dia any amin'ny toerana maha-vahiny azy aza.
Araka ny fotoana anananao, vakio (na ataovy indray mitopy maso) ny bokin'i Estera ho an'ny fianarana amin'ity herinandro ity.