Vakio ny Apôk. 22:11,12 sy ny Dan. 12:1,2 ary ny Jer. 30:5-7. Inona ny toe-javatra mitranga mialoha indrindra ny fiavian'i Jesôsy fanindroany?
Aorian'ny fikatonan'ny varavaram-pahasoavana dia hisy fotoan-tsarotra "izay tsy nisy tahaka azy hatrizay nisian'ny firenena ka hatramin'izany andro izany." Milazalaza ny amin'ireo loza fito farany izay harotsaka amin'ity tontolo feno faharatsiam-panahy ity ny Apôk . 16. Tahaka ireo loza izay nianjady tamin'i Egipta anefa, dia harovana tsy ho voan'izany ny vahoakan'Andriamanitra. Mariho ny teny fikasana ao amin'ny Daniela: "(...) ary amin'izany dia ho afaka ny firenenao, dia izay rehetra hita voasoratra ao amin'ny boky."- Dan. 12:1. Azo antoka fa ny "bokin'ny fiainana" io voalaza io (jereo ny Fil. 4:3; Apôk. 13:8; Apôk. 20:12, 15; Apôk. 22:19).
Raha nitoetra ho mahatoky tamin'i Jesôsy isika, dia tsy hofafana ao amin'ny bokin'ny fiainana ny anarantsika (Apôk . 3:5).
Vakio ny 1 Jao. 3:1-3; Jao. 8:29 ary ny Jao. 14:30. Inona ny hany fiomanana ilaina hiatrehana ny fotoan-tsarotra izay ho avy?
Manana fifandraisana manokana sy lalina amin'i Jesôsy ny vahoakan'Andriamanitra, amin'ny fotoan-tsarotra, ka tsy hisy na inona na inona hanova izany. Ny fanirian'izy ireo lalina dia ny hanao izay sitrany amin'ny zavatra rehetra mba hahatonga azy ireo hadio tahaka Azy madio, amin'ny alalan'ny asan'ny Fanahy Masina. Tsy nisy na inona na inona tao amin'ny fon'i Kristy izay nanaiky ny fitaka nataon'i Satana. Azontsika atao ihany koa ny maneho taratra izany Iafin-toetrany izany.
Vakio ny Sal. 27:5; Sal. 91:1-11 ary ny Apôk . 3:10-12. Inona ny fampanantenana feno toky izay atolotr'Andriamanitra antsika hiatrehana ny fotoan-tsarotra?
Misy olona sasany izay tsy nahatakatra araka ny tokony ho izy ny hevitry ny hoe miaina ao anatin'ny fotoan-tsarotra kanefa tsy manana mpanelanelana. Mampitsahatra ny fanelanalenana ataony ao amin'ny tabernakely any an-danitra I Jesôsy rehefa samy nanao ny safidy farany avokoa ny olona rehetra, na homba Azy na hanohitra Azy. Tsy midika anefa izany fa irery isika ao anatin'izany fotoana izany ka tsy manana afa-tsy herintsika mba hitokiana. Efa nanome toky i Jesôsy fa homba antsika mandrakariva (Mat. 28:20). Ny finoana dia matoky na dia tsy mahita aza, ary mino na dia mirodana aza ny tontolo manodidina antsika. Ao anatin'ny fotoan-tsarotra, dia mihamatanjaka ny finoantsika ary mitombo ny faniriantsika fatratra ny mandrakizay, ka ny hany zavatra irintsika dia ny hiara-monina amin'i Jesôsy mandrakizay.