Vakio ny Jao. 14:1-3 sy ny Tit. 2:11-14. Eo anatrehan'ny fihaikana amin'ny hoavy sy ny fotoan-tsarotra, nahoana ireo toko sy andininy ireo no mampahery?
Ny tenin'i Jesôsy hoe: "Aza malahelo ny fonareo", dia toky omeny fa tsy handao antsika velively Izy ary ho avy indray haka antsika hody. Tsy fonenantsika eto amin'ity tontolo ity; ho avy ny andro tsara kokoa. Toko sy andininy 1 isaky ny 25 no miresaka ny amin'ny fiverenan'ilay Tompontsika ao amin'ny Testamenta Vaovao. Rehefa manjombona ny andro ary mandrahona ny aintsika ny fampahoriana ataon'ny fanjakana-fiangonana, dia ny teny fikasana ny amin'ny fiavian'i Kristy no mameno fanantenana ny fontsika. Izany no "fanantenana mahafinaritra" namelombelona ireo vahoakan'Andriamanitra mahatoky teo amin'ireo taranaka maro nifandimby.
Vakio ny Apôk. 6:15-17 sy ny Isa. 25:8,9. Ampitahao ny fihetsik'ireo voavonjy sy ireo very izay hita ao amin'ireo andalanteny ireo. Inona no anton'ny fahasamihafan'ireo fihetsika ireo.
Tsapan'ny ratsy ny vokatra mahatsiravin'ny fahotana, fa ny marina kosa mandray ny fahasoavany mahatalanjona atolotra azy. Miteraka tahotra, fahatsiarovan-tena ho meloka, fanamelohana, ary fahaverezana mandrakizay amin'ny farany ny fikomiana amin'Andriamanitra. Ny fandraisantsika ny fahasoavany mahavonjy no mitondra ho amin'ny famelan-keloka sy ny fiadanana ary ny fifaliana mandrakizay amin'ny fiverenany be voninahitra.
Vakio ny Apôk. 15:3,4 sy ny Apôk. 19:7. Ahoana no ataon'ireo voavotra eo anatrehan'ny famonjena be voninahitra atolotra maimaimpoana amin'ny alalan'i Kristy?
"Ny hazo fijalian' i Kristy no ho fianarana sy ho anton-kiran'ny voavotra mandritra ny mandrakizay manontolo. Ao aminl Kristy omem-boninahitra no hibanjinany Kristy voahombo. (...) Raha Ilay nahary izao tontolo rehetra izao, llay Mpandahatra ny anjaran'ny rehetra, no nanaiky ny hametraka ny voninahiny ka nanetry tena noho ny fitiavana ny olombelona, izany dia hampitolagaga mandrakariva ny tany amandanitra sy hahatonga azy hiankohoka Aminy."- HM, t. 677.
Vakio ny Apôk . 12:17; Apôk. 17:13,14 ary ny Apôk. 19:11-16. Mariho tsara ny fivoarana hita ao amin'ireo andalan-teny ireo. Inona no ambaran'izany mikasika ny ady farany eto an-tany sy ny fandresena farany azon'i Kristy?