Tamin'ny taona 1851 no nampifandraisan'ireo mpamaky lay Advantista ny bibidia faharoa ao amin'ny Apôk . 13:11-17 amin'i Etazonia. Azo antoka anefa fa sarotra tamin'izany fotoana izany ny nieritreritra ny fomba haneren'i Etazonia an'izao tontolo izao hiankohoka amin'ilay bibidia voalohany (Apôk . 13:12). Na tamin'ireo taona 1880 aza mantsy dia zara raha nanana sambo efa antitra 48 ny tafika an-dranomasin'i Etazonia. Nanomboka tamin'ny fiafaran'ny ady mangatsiaka anefa dia tsy misy hery afa-mitaha amin'izay ananan'ny tafik'i Etazonia. Ary na dia nisitraka fahafahana mahatalanjona aza ireo Amerikanina, rehefa nihasarotra ny toe-javatra, dia hita ihany ny fanitsakitsahana ireny fahafahana ireny, na ny fanohintohinana izany mihitsy aza. Inoan'ny maro fa na amin'izao andro izao aza dia mitranga izany.
"Izay rehetra manda tsy hilefitra dia hiharan'ny sazy ahatran'ny fanjakana, ary amin'ny farany dia holazaina fa mendrika ny ho faty izy ireo. Etsy andaniny anefa, ny lalàn'Andriamanitra dia mandidy ny hitandremana ny andro fitsaharan'ny Mpamorona ka mampitandrina izay rehetra mandika ny fitsipika ny amin'ny fahatezeran'Andriamanitra."- HM, t. 630.
"Raha manatona ny tafio-drivotra, dia misy antokon'olona maro izay niseho ho mino ny hafatry ny anjely fahatelo, nefa tsy nohamasinina tamin'ny alalan'ny fankatoavana ny fahamarinana, no hiala amin'ny toerany ankehitriny ka hirotsaka eo amin'ny laharan'ny mpanohitra. Niray tamin'izao tontolo izao izy sady nifindran'ny toe-tsainy, ka nanjary saiky nitovy ny fomba fijeriny ny toejavatra; ary rehefa tonga ny fisedrana, dia efa voaomana mialoha hifidy ny lalana mora arahin'ny besinimaro izy ireo. Misy olona manan-talenta sy fahaizana mahataona, izay efa nahita fifaliana tamin'ny fanarahana ny fahamarinana, nefa ankehitriny dia mampiasa ny heriny hamitaka ny fanahy sy hampivily azy amin'ny lalan-diso. lreo no hanjary fahavalon'ny rahalahiny teo aloha sady hasiaka indrindra. Rehefa hoentina eo anatrehan'ny fitsarana ny mpitandrina ny Sabata mba hanazava ny amin'ny finoany, dia ireny mihemotra ireny no ho fiasan'i Satana mahomby indrindra mba hanosoram-potaka sy hiampangana azy, ka ny tatitra lainga hataony sy ny hevitra hasosony no hanosika ny mpanapaka hamely azy ireo." - HM, t. 634.
FANONTANIANA hifanankalozan-kevitra :
1. Nahoana no zava-dehibe tokoa ny fahatakarana ireo toe-javatry ny andro farany izay hiseho amin'ny fotoan-tsarotra ho avy? Ahoana no mahatonga ny Soratra Masina ho fiarovana amin'ny famitahana?
2. Firenena demokratika maro maneran-tany no iorenan'ny fahafahana ara-pivavahana nandritra ny taonjato maro. Ahoana no hiovan'izany amin'ny fomba haingana dia haingana?
3. Jereo ny fanambaran'i Ellen G. White etsy ambony. Inona ny safidy ataonao ankehitriny izay mety hahatonga anao hiandany amin'ireo izay miseho ho Advantista rahampitso?
4. Ahoana no niovan'ny hafatry ny anjely faharoa ho amin'ny feo mahery, ary inona ny fiomanana manokana azontsika atao mba handraisantsika ny fara-orana hamitana ny asan’Andriamanitra maneran-tany.