Tahaka ny nampiasan'Andriamanitra ireo mpanavao fivavahana protestanta mba hanamafy ny fahamarinana momba ny fanamarinana amin'ny finoana ao amin'i Kristy irery ihany, dia toy izany koa no nampiasany an'i William Miller hanamafy ny fahamarinana momba ny fiavian'i Kristy fanindroany. Raha nianatra ny Soratra Masina i Miller dia hitany i Kristy tia azy mihoatra noho izay mety ho takatry ny sainy. Nanomboka namaky ny Baiboliny, nanomboka tamin'ny Genesisy izy, niaraka tamin'ny penina sy ny fandraisana an-tsoratra, ary tsy nandroso ho amin'ny manaraka raha tsy efa nazava tsara taminy ny andalan-tSoratra novakiny. Tamin'ny fampitahana ny Soratra Masina amin'ny Soratra Masina no namelany ny Baiboly hanazava ny tenany.
Vakio ny Isa. 28:9,10; Ohab. 8:8,9; Jao. 16:13; sy ny 2 Pet. 1:19-21. Inona avy ireo fitsipika fanazavana ny Baiboly hitanao ao amin'ireo andininy ireo?
Nisokatra teo anoloan'i William Miller ireo zava-miafin'ny Baiboly arakaraka ny nampitahany ny Soratra Masina tamin'ny Soratra Masina. Nikatsaka izany toy ny fikatsaka harena miafina izy ka nandray ny haren'ny valin-kasasarany. Nanokatra ny sainy hahatakatra ny Tenin'Andriamanitra ny Fanahy Masina. Tamim-pahavitrihana tahaka ny nandinihany ireo lahatsoratra hafa tao amin'ny Baiboly ihany no nandinihany koa ny faminaniana.
Vakio ny Dan. 1:17; Dan. 2:45; 1 Pet. 1:10,11; sy ny Apôk . 1:1-3. Inona no ampianarin'ireo andininy ireo antsika momba ny fahatakarana ireo faminanian'ny Baiboly?
Tsy mifono zava-miafina ireo famantarana ao amin'ny boky faminaniana. Nomen'llay Andriamanitra fitiavana antsika ny Teny faminaniany hanomanana antsika ho amin'ireo toe-javatra mafy indrindra hitranga tsy ho ela eto amin'ity tany ity. Takatr'i William Miller tsara fa ny faminaniana ihany no mahay manazava indrindra ny tenany. Ny Baiboly no manazava ireo famantarana ao amin'ny faminaniana. Maneho mpanjaka na fanjakana ny bibidia (Dan. 7:17,23). Ny rivotra dia maneho ny faharavana (Jer. 49:36). Ny rano dia maneho vahoaka na firenena maro (Apôk . 17:15). Ny vehivavy dia maneho ny fiangonana (Jer. 6:2, Efes. 5:22-32). lreo faminaniana momba ny fotoana ao amin'ny Daniela sy Apôkalipsy koa dia lazaina ara-tandindona, iray andro ara-paminaniana mira iray taona ara-bakiteny (Nom. 14:34, Ezek. 4:6). Rehefa nampihatra ireo fitsipika fanazavana ny Baiboly ireo i William Miller dia talanjona teo am-pahitana izay noheveriny ho fotoana hiverenan'i Kristy.
Nahoana no zava-dehibe tokoa ho an'ny finoantsika ny fahatakarana araka ny tokony ho izy ireny sary an'ohatra ara-paminaniana ireny?