Hodinihina mandritra ny herinandro:
Mar. 4:1-34; Jak. 1:21; Isa. 6:1-13; Sal. 104:12; Dan. 4:10-12.
Tsianjery:
"Ary hoy Izy taminy: Diniho izay teny renareo; araka ny ohatra anoharanareo ihany no hanoharana ho anareo, ary homena mihoatra aza hianareo. Fa izay manana no homena; ary ny amin'izay tsy manana, na dia izay ananany aza dia halaina aminy." - Mar. 4:24,25.
Ireo fanoharana ao amin'ny Mar. 4 no ifantohan'ny lesontsika amin'ity herinandro ity. Ny filazantsaran'i Marka no ahitana fanoharana vitsy indrindra amin'ireo filazantsara izay manana fitoviana betsaka (Matio, Marka ary Lioka).
An-taonany maro ireo manam-pahaizana momba ny Baiboly no niady hevitra mikasika ny dikan'ireo fanoharana nataon'i Jesōsy sy ny fanazavana izany: ny fomba hanazavana sy ny hevitr'izany, ny antony nampiasan'i Jesôsy izany, ny lesona tian'ireny haseho, ary ny fomba tokony handraisana izany (ara-bakiteny na koa amin'ny maha sary an'ohatra azy), sns.
Mazava loatra fa tsy ho voavalintsika ao anatin'ny lesona amin'ity herinandro ity avokoa ireo fanontaniana rehetra ireo. Hodinihintsika izany, ary noho ny fahasoavan'Andriamanitra, dia ho takatsika ireo hevitra tian'i Jesõsy hambara amin'ny alalan'ireo fanoharana ireo.
Ahitana fanoharana dimy ao amin'ny Mar. 4: momba ny mpamafy, ny jiro, ny vata famarana, ny voa mitsimoka, ary ny voantsinapy. Saika mihodidina amin'ny fanoharana mikasika ny mpamafy io toko io. io fanoharana io no notantaraina voalohany, rehefa izay dia nambara ny antony nanaovany izany, ary manaraka izany ny fanazavana ilay fanoharana. Izany drafitry ny lahatsoratra misy dingana telo izany no hifantohan'ny lesontsika ho an'ny Alahady sy ny Alatsinainy ary ny Talata. Aorian'izay no hianarantsika ireo fanoharana ambiny, dia ny Alarobia sy ny Alakamisy.