Fotoana nety indrindra nahafahan'i Jaona nanasongadina ny maha-Izy an'i Jesôsy ny fahagagana tao amin'ny farihin'i Betesda. Andininy miisa sivy no nentiny nilazalaza momba io fahagagana io ary andininy 40 teo ho eo kosa (jereo eo ambany) no nentiny nilazalaza ny momba Ilay nanatanteraka izany fahagagana izany.
Vakio ny Jao. 5:16-18. Nahoana i Jesôsy no nenjehina noho ny zavatra nataony tamin'ny Sabata?
Mety ho hafahafa ny Jao. 5:18 satria toy ny milaza izany fa nandika ny Sabata i Jesôsy. Rehefa dinihina akaiky anefa ny Jao. 5:16-18 dia hitantsika ny fanambaran'i Jesôsy fa ny "asa" nataony tamin'ny Sabata dia nifanindran-dalana tamin'ny fifandraisany amin'ny Rainy. Tsy mampitsahatra ny famelomany an'izao tontolo rehetra izao Andriamanitra rehefa Sabata. Araka izany, ny fihetsika nataon'i Jesôsy tamin'ny andro Sabata dia anisan'n'y fanehoany ny maha-Andriamanitra Azy. Nanenjika Azy ireo mpitondra fivavahana noho ny amin'izay noheverin'izy ireo ho fandikana ny Sabata sy ny fanambarany ny fitoviany amin'Andriamanitra.
Vakio ny Jao. 5:19-47. Inona no nambaran'i Jesôsy mba hanampiana ireo mpitarika hahita Azy araka izay tena toeny tokoa, fanambarana momba ny Tenany izay niseho tamin'ny fomba miezinezina tamin'ny alalan'ny fahagagana izay vao avy nataony?
Dingana telo no nentin'i Jesôsy niaro ny asa nataony :
Voalohany, nohazavainy ny fifandraisany ety ananany amin'ny Ray (Jao. 5:19-30). Ambaran'i Jesôsy fa miasa amim-pirindrana amin'ny Rainy Izy; nolazainy mihitsy aza fa manana fahefana hitsara sy hanangana ny maty Izy (Jao. 5:25-30).
Faharoa, niantso "vavolombelona" efatra nifandimby izay manambara Azy i Jesôsy taorian'ny fiarovan-tenany: (1) i Jaona Mpanao batisa (Jao. 5:31-35); (2) ny fahagagana nataony (Jesôsy) (Jao. 5:36); (3) Andriamanitra Ray (Jao. 5:37,38); ary (4) ny Soratra Masina (Jao. 5:39). Samy manao fanambarana mikasika an'i Jesôsy ireo "vavolombelona" ireo.
Farany, ahariharin'i Jesôsy Manoloana ireo mpiampanga Azy ny fahamelohan'izy ireo, ao amin'ny Jao. 5:40-47, izay anehoany ny fahasamihafana eo amin'ny Asany sy ny fitadiavan'izy ireo ny tombontsoany manokana. Nambaran'i Jesôsy fa i Mosesy izay nitokian'izy ireo no hanameloka azy (Jao. 5:45-47).
Ahoana no hitandremantsika mba tsy ho lavo ao anatin'ny fandriky ny finoana an'Andriamanitra, na ny fananana ny foto-pampianarana marina mihitsy aza, kanefa tsy manana fileferana tanteraka amin'i Kristy? Ento ao amin'ny kilasy ny valin-teninao amin'ny Sabata.