Hodinihina mandritra ny herinandro: Jao. 13:1-20; Jao. 14:1-3; Dan. 7:27; Jao. 14:5-11; Jao. 1:14; Kôl. 1:16, 17; Jao. 5:38-40.
Tsianjery: "Tsy nisy nahita an'Andriamanitra na oviana na oviana; fa ny Zanakalahy Tokana, Izay ao an-tratran'ny Ray, Izy no nanambara Azy." Jao. 1:18.
Mizara efatra lehibe ny filazantsaran'i Jaona: ny fitarihan-teny (Jao. 1:1- 18), ny bokin'ny famantarana (Jao. 1:19-12:50), ny bokin'ny voninahitra (Jao. 13:1-20:31), ary ny fehin-tantara (Jao. 21:1-25). Ny fitarihan-teny sy ny bokin'ny famantarana no nodinihintsika hatreto, izay mampiseho hoe iza i Jesôsy , raha ny fahagagana (famantarana) sy ny resaka ary ny fampianarana nataony no jerena. Ny fizarana fahatelo kosa no hifantohantsika izao, dia ny bokin'ny voninahitra. Mahaliana fa toy ny tetezana mampitohy ny bokin'ny famantarana sy ny bokin'ny voninahitra ireo fanambarana fito nataon'i Jesôsy hoe: "Izaho no (...)". Ireto avy izy ireo: Izaho no "mofon'aina" (Jao. 6:35,41,48,51), "fahazavan'izao tontolo izao" (Jao, 8:12, Jao. 9:5), "vavahady" (Jao. 10:7,9), "mpiandry tsara" (Jao. 10:11,14), "fananganana ny maty sy fiainana" (Jao. 11:25), "làlana sy fahamarinana ary fiainana" (Jao. 14:6), ary "tena voaloboka" (Jao. 15:1,5).
Hojerentsika voalohany ao amin'ity lesona ity ny tanjon'ilay hafatra farany nataon'i Jesôsy sy ny amin'ilay fotoa-manan-danja nanasany ny tongotry ny mpianany. Avy eo dia hodinihintsika ilay fanambarana ao amin'ny Jao. 14 hoe: "Izaho no lalana sy fahamarinana ary fiainana."