Vakio ny 2 Kor. 7. Nanao ahoana ny fihetsehampon'i Paoly raha reny fa nibebaka Ireo Korintianina?
Fitiavan-dehibe tokoa no fonosir'ny teny hoe: "ao am-ponay hianareo"- 2 Kor. 7:3; jereo koa ny 2 Kor. 6:11. Izao koa no nolazain'i Paoly noho ny faniriany lalina ny hamaliana fitia izany fitiavany izany: "Ataovy omby anay ny fonareo"- 2 Kor. 7:2. Tsy ahitana ny teny hoe "ao am-ponareo" ao amin'ny lahatsoratra grika, nefa maro ireo dikanteny manampy izany, ary tsy diso izany satria manohana azy ny tontolon-kevitry ny lahatsoratra.
Nanokatra ny fon'izy ireo ho an'i Paoly sy ireo mpiara-miasa aminy tokoa ireo Korintianina. Izany no mahatonga ny and. 4 ho fanehoam-pifaliana lehibe. Asehon'ny tenin'i Paoly fa fihetsehampo miabo no tsapany tamin'izany fotoana izany: "Be ny fahatokiako anareo, lehibe ny reharehako ny aminareo; feno fiononana aho sady be hafaliana indrindra amin'ny fahorianay rehetra."- 2 Kor. 7:4. Feno fiononana sy hafaliana i Paoly. Endrey ny fiononana sy ny fifaliana ao am-pon'ireo mpitandrina ny fiangonantsika rehefa manolo-tena amim-pahatokiana ho an'i Kristy isika!
Manazava bebe kokoa ny anton'izany fiononana sy fifaliana izany i Paoly ao amin'ny 2 Kor. 7:5-16. Ireo lohahevitra roa ireo no tena foto-dresak'io toko io. Impito raha atontaly no ahitana ny matoanteny parakaleō ("mampionona") na ny anarana paraklēsis ("fampiononana") ao amin'ny 2 Kor. 7. Mifarana amin'ny fomba niantombohany ihany io ampahany amin'ilay epistily io, amin'ny fampiononana avy amin'Andriamanitra (2 Kor. 1:3-7). Ny fiononan'i Paoly ao amin'ny 2 Kor. 7 dia avy amin'ny fahamaivamaivanana tsapany, satria nitondra ny vokatra nandrasany ny epistily fananarana nosoratany ho azy ireo.
Na dia vokatry ny tatitra tsara nataon'i Titosy aza ny fahamaivamaivanana tsapan'i Paoly, dia Andriamanitra no tena nitondra fampiononana ho azy (2 Kor. 7:6). Andriamanitra tokoa no "Andriamanitry ny fampiononana rehetra, Izay mampionona anay amin'ny fahorianay rehetra."- 2 Kor. 1:3, 4.
Mahaliana fa "be hafaliana" i Paoly raha "feno fiononana."- 2 Kor. 7:4, 7, 13. Na dia niteraka falahelovana aza ny epistily hentitra sy feno fananarana nosoratany, dia alahelo araka ny sitrapon'Andriamanitra izay miasa fibebahana izany (2 Kor. 7:9-11). Alahelo "araka an'Andriamanitra" no tao amin'ireo Korintianina (2 Kor. 7:11), alahelo izay "miasa fibebahana ho famonjena."- 2 Kor. 7:10. Inona moa no mitondra fifaliana lehibe kokoa mihoatra noho ny fanompoana tena izy an'Andriamanitra.
Efa nahatsapa alahelo araka an'Andriamanitra ve ianao teo amin'ny fiainanao? Ahoana no nahalalanao fa alahelo mifanaraka amin'ny sitrapon'Andriamanitra izany, izay nitarika anao hibebaka?