MBOLA MIBAHANA AO AN-TSAINA NY LASA
Avereno vakina ny Jos. 22:13-15 saingy ampitahao amin'ny Nom. 25. Nahoana ny Isiraelita no nifidy an'i Finehasa hitarika Ireo solontenan'ny Isiraely hankany amin'ireo foko roa sy ny antsasaky ny fokan'i Manase?
Mialoha ny hinoana ny honohono mikasika izay noheverina ho fanehoana fahaleovan-tena na fitokanana, dia naniraka solontena ireo foko sivy sy ny antsasaky ny fokon'i Manase, izay notondroina indroa hoe "zanak'Isiraely", mba hamantatra mazava ny hevitr'llay alitara sy ny antony nananganana azy. Tao anatin izany solontena izany i Finehasa, zanak'i Eleazara mpisoronabe, izay handimby an-drainy rehefa maty izy (Jos. 24:33). Efa fantatry ny olona i Finehasa tamin'ny maha-mpisorona izay nampitsahatra ny fijangajangan'ny Isiraely azy, tany Bala-peora (Nom. 25).
"Ary raha nahita izany Finehasa, zanaki Eleazara, zanaki Arona mpisorona, dia nitsangana niala teo amin'ny fiangonana izy ka nitondra lefona teny an-tanany: dia nandeha nanaraka ilay lehilahy Isiraelita tao an-day izy, ary nataony indray nandefona izy roroa, dia ny lehilahy Isiraelita sy ny vehivavy, ka voagorobaka hatrany amin'ny kibon-dravehivavy. Dia natsahatra ny areti-mandringana teo amin'ny Zanak'Isiraely." -Nom. 25:7,8.
Azo antoka tokoa fa nanana hery miasa mangina teo amin'ny Isiraely i Finehasa. Ireo iraka hafa indray dia solontenan'ireo firenena sivy sy ny antsasaky ny firenen' Manase izay avy any an-dafy andrefan'i Jordana, lohan'ny fianakaviana isam-poko (izany hoe "lohan'ny fianakavian-drainy" ara-bakiteny), tao amin'ireo fokon'ny Isiraely.
Raha nanomboka ny fiampangana momba ny fahavetavetana sy ny fikomiana ireo solontena, dia ny teny fampiasan'ny mpaminany no nampiasain'izy ireo: "Izao no lazain'ny...." Ny fahasamihafana eto anefa dia tsy Jehôvah no miteny fa ny "fiangonan'i Jehovah rehetra - Jos. 22:16. Nampangain'izy ireo ho nanao zava-mahadiso sy nanao fivadiham-pitokisana ary fikomiana ny Isiraely. Ny teny hoe "zava-mahadiso" eto ihany no teny hebreo nampiasaina hilazana ny fahotan'i Akana (Jos. 7:1) ary imbetsaka no ampiasana izany ao amin'ireo boky dimy voalohany nosoratan'i Mosesy (ohatra: Lev. 5:15; Lev. 5:21: Nom. 5:6, 12). Noraisina ho ohatra naneho izany ny nahazo an'i Akana sy Bala-peora: ny iray ohatry ny fivadiham-pitokisana ary ny iray fikomiana. Natahotra koa ireo foko sivy sy ny antsasaky ny fokon'i Manase andrao ny fananganana alitara tsy nahazoan-dalana hitarika ho amin'ny fihemorana sy ny fanompoan-tsampy ary ny fanao ratsy izay hampirehitra ny fahatezeran'i Jehovah amin'ny firenen'ny Isiraely manontolo.
Isika rehetra dia samy efa nandalo tamin'ny fanandramana ratsy tamin'ny lasa, izay hamolavola ny fomba fiatrehantsika ny toe-javatra tahaka izany amin'ny hoavy. Ahoana no anampian'ny fahasoavan' Andriamanitra antsika hahazo antoka fa tsy hamaritra ny fomba fitondrantsika ny namantsika amin'izao fotoana izao ny toe-javatra mahatsiravina niainantsika tamin'ny lasa?