Vakio ny Jao. 18:38-19:5. Tamin'ny fomba ahoana no niezahan'i Pilato nandresy lahatra ny vahoaka hangataka ny famotsorana an'i Jesôsy ?
Tsy niandry valin-teny avy amin'i Jesôsy momba ny fahamarinana i Pilato fa nivoaka tany ivelany izy, niezaka nandresy lahatra ny vahoaka. Mbola nifandahatra tamin'izy ireo indray anefa izy fa tsy avy hatrany dia nandefa an'i Jesôsy , koa izay no nahavoa azy. Hitan'ireo mpitondra fivavahana fa azony nentina tamin'ny sangany i Pilato, tamin'ny alalan'ny vahoaka.
Nisy fanaon'ny Jiosy noresahin'i Pilato, dia ny famotsorana gadra anankiray rehefa Paska. Koa nanontany ny vahoaka izy raha tian'izy ireo ny hamotsorana ny "mpanjakan'ny jiosy. Somary mahatsikaiky ihany kanefa mampalahelo sady mahagaga fa naleon'ny vahoaka i Barabasy, izay jiolahy, no havotsotra, toy izay i Jesôsy tsy manan-tsiny.
Dia nanomboka ny fanesoana sy ny fanarabiana an'i Jesôsy. Nandrandrana satroka tsilo ho Azy ny miaramila romanina ary nampitafy Azy lamba volomparasy, sady nanatona sy naneso Azy hoe: "Arahaba, ry Mpanjakan'ny Jiosy!". Tahaka izany no fiarahaban'ny miaramila ny amperora, saingy teto dia natao fanarabiana izany.
Toa nanantena hanetsika ny fangorahan'ny vahoaka i Pilato, nitady fomba hanafahana an'i Jesôsy. Navoakany ho hitan'ny vahoaka i Jesôsy , nanao satro-tsilo sy niakanjo volomparasy. Dia teo i Jesôsy, nitafy akanjo maha-mpanjaka izay naniratsirana Azy, ary i Pilato niteny tamin'ny vahoaka hoe: "Indro ny Lehilahy! Jao. 19:5; tsy nisy fanampim-panazavana hafa avy amin'i Jaona ny amin'izany tranga rehetra izany. Mampahatsiahy ilay tenin'i Jaona mpanao batisa ao amin'ny Jao. 1:29 io, hoe: "Indro ny Zanak'ondrin' Andriamanitra, Izay manaisotra ny fahotan'izao tontolo izao!" - Ny govemora mihitsy izao no nampiseho ny Mesia teo anoloan'ny Isiraely tao anatin'ny fitafian'ny maha-mpanjaka; fanesoana re izany, kanefa tsy fantany fa Izy tokoa no Mpanjaka!
Voalaza ao amin'ny Jao. 19:6-16 anefa fa nangataka ny hanomboana Azy tamin'ny hazo fijaliana ny vahoaka, satria nilaza ny Tenany ho Zanak'Andriamanitra Izy. Naharaiki- ahotra an'i Pilato izany, izay vao mainka nitady izay fomba hanafahana an'i Jesôsy. Namaritra ny anjaran'i Jesôsy anefa ireo mpitondra fivavahana tamin'ny nilazany fa fanoherana an'i Kaisara ny fanafahana an'i Jesôsy. Fantatr'izy ireo fa ny fahatokian'i Pilato tamin'i Kaisara dia hanakana azy tsy hanafaka olona izay mitonona ho manan-toerana tahaka ny an'i Kaisara. Nilaza ireo mpitondra fivavahana ireo fa tsy manana mpanjaka afa-tsy i Kaisara. Hita amin'izany fa lehibe lavitra noho ny faniriany soa ho an'ny fireneny ny fankahalany an'i Jesôsy. Naleony mihitsy nanao sorona ny fahaleovan-tenan'ny fireneny, izay efa nokatsahiny hatry ny ela, toy izay hamela an'ity Jesôsy ity ho afaka.
Tena mampatahotra tokoa ny hoe mpanapaka mpanompo sampy iray по naniry hanafaka an'i Jesôsy, tamin’ireo mpitondra fivavahana teo amin'ny fireneny kosa, izay tokony ho nahafantatra Azy, ireo indray no nitaky ny hanomboana Azy teo amin'ny hazo fijaliana! Inona ny lesona azontsika raisina ho an'ny tenantsika avy amin'izany?