Vakio ny Jao. 9:17-34. lnona ireo fanontaniana napetrak'ireo mpitondra fivavahana, ary inona no navalin'ilay jamba sitrana azy ireo?
Io ampahan-dahatsoratra lava ao amin'ny Jao. 9 io no hany tsy ahitana an'i Jesôsy ho mpandray anjara fototra, na dia Izy aza no foto-dresaka ao. Tahaka ilay fanontaniana mikasika ny fahotana any amin'ny fiantombohan'ny tantara (Jao. 9:2), dia nihevitra koa ny Fariseo fa mpanota i Jesôsy satria nanasitrana tamin'ny andro Sabata (Jao. 9:16,24), ary nanaraby llay lehilahy sitrana izy ireo hoe: "Tena teraka tamin'ny ota ialahy"— Jao. 9:34.
Mahaliana ny fifanoheran-javatra eto. Nihanazava hatrany ny fahitan'ilay jamba, tsy ara-nofo ihany fa ara-panahy koa, satria nitombo ny fankasitrahany an'i Jesôsy sy ny finoany Azy. Fa ny Fariseo kosa nihajamba hatrany tao an-tsainy, voalohany, noho ny fisarahan-tsainy ny amin'i Jesôsy (Jao. 9:16), ary faharoa, noho ny tsy nahafantarany izay niavian'i Jesôsy (Jao. 9:29).
Amin'ny alalan'ny fitantarana io fahagagana io koa no ahafahan'i Jaona manambara amintsika hoe Iza moa i Jesôsy. Mifandray amin'ireo lohahevitra maro hafa ao amin'ilay filazantsara ity lohahevitra momba ny famantarana ao amin'ny Jao. 9 ity. Averin'i Jaona eto, ohatra, fa i Jesôsy no fahazavan'izao tontolo izao (Jao. 9:5, ampitahao amin'ny Jao. 8:12). Miresaka ny amin'ny fiavian'i Jesôsy koa ity tantara ity, izay zava-miafina. Iza moa Izy, avy aiza, ary inona ny asa nanirahana Azy? (Jao. 9:12,29; ampitahao amin'ny Jao. 1:14). Hita ao amin'ity toko ity koa ny fampitahana an'i Jesôsy amin'i Mosesy, tahaka ny ao amin'ny toko eo aloha (Jao. 9:28,29; ampitahao amin'ny Jao. 5:45,46 sy ny Jao. 6:32).
Mampatahotra tokoa ny fahajambana ara-panahy mahazo ireto mpitondra fivavahana ireto. Hoy ilay lehilahy jamba efa sitrana: "Hatrizay hatrizay dia tsy mbola re fa nisy nampahiratra ny mason'izay teraka jamba. Raha tsy avy amin'Andriamanitra izany Lehilahy izany, dia tsy mahefa na inona na inona lzy."— Jao. 9:32,33. Ireo mpitondra fivavahana anefa, dia ireo mpitarika ara-panahy ny firenena, ireo izay tokony ho nahafantatra voalohany an'i Jesôsy sy nanaiky Azy ho Mesia, izy ireo indray no tsy nahita izany, na dia teo aza ireo porofo mahery vaika rehetra. Na, raha ny marina, tsy te hahita izy ireo. Fampitandremana lehibe izany fa afaka mamitaka antsika tokoa ny fontsika!
Vakio ny 1 Kôr. 1:26-29. Mifanaraka tsara amin'ny toe-javatra vao noresahantsika ny ambaran'i Paoly eto; amin'ny fomba ahoana? Ahoana no fisehon'izany foto-kevitra izany na dia ankehitriny aza?