Tsy teny fampiasan'ny olona matetika andavanandro ny hoe "fahamasinana", angamba satria vitsy loatra no mba zava-masina manodidina antsika. Ny Sabata dia andro masina eo amin'ny fotoana, ary mazava loatra, Andriamanitra dia masina. Tsy misy fahamasinana ny fiainantsika andavanandro raha tsy miaraka amin'Andriamanitra.
Ho hitanao, rehefa mandinika izay voalaza matetika ny amin'ny toetran'Andriamanitra lanao, fa ny fahamasinana no ivon'ny maha Izy Azy. Saingy inona no hevitr'izany?
Amin'ny fomba ahoana no anoritsoritan'ireto andinin-tSoratra Masina manaraka ireto an'Andriamanitra: Lev. 20:26, 1 Sam. 2:2, Isa. 57:15, ary ny Ezek. 38:23?
Rehefa manoritsoritra an'Andriamanitra ho masina ny Baiboly, dia midika izany fa tsy ahitana ratsy na ota mihitsy ao Aminy ary tsy misy ifandraisana Aminy velively izany. Tsara 100 isan-jato Andriamanitra, hatramin'ny voalohany ka hatramin'ny farany. Araka izany. ny fahamasinan Andriamanitra no fototry ny toetrany hafa rehetra.
Ohatra, ny fitiavan'Andriamanitra dia fitiavana madio sy masina-fitiavana mihevitra ny hafa sy tsy misy na inona na inona mety ho endrika fitiavan-tena. Fahalalana masina ny fahalalany ny zavatra rehetra, izay tsy mifono fikasan-dratsy. Hatoky an'Andriamanitra halala ny zavatra rehetra ve ianao raha tsy masina Izy? Mazava Ma loatra fa tsia! Hatahotra Azy aza isika, ary rariny izany.
Ny fahefan'Andriamanitra tsy voafetra dia hery masina. Alao sary an-tsaina ny Andriamanitra iray izay tsitoha nefa tsy masina. Mety ho mpanjakazaka lozabe Izy. Ny fahamasinan Andriamanitra irery ihany no mahatonga antsika sy ahafahantsika mitia Azy marina, satria tsara Izy hatramin'ny voalohany ka hatramin'ny farany. Izany no inoana fa ny fahamasinana no toetra manan-danja indrindra tokony ho takatra momba an'Andriamanitra. Kanefa, azo lazaina fa io koa no anisan'ny toetrany tsy takäatry ny olona araka ny tokony ho izy indrindra.
Saino ny amin'ireo olona tantaraina ao amin'ny Baiboly, toa an'i Mosesy, Isala, Ezekiela, Daniela, ary Jaona, izay nankeo anatrehan Andriamanitra, Inona no fihetsika nataon'izy ireo voalohany? Nesoriny ny kapa teny an-tongony, nafeniny ny tavany, na lavo tamin'ny tany toy ny maty. Olombelona mpanota isika, tsy masina velively, hany ka tsy mahazaka ny mijoro eo anatrehan Andriamanitra. Tsy mba ho velona ny olombelona rehetra izay mijery ny tavan'Andriamanitra. Toy izany koa, rehefa nomena fahitana i Ellen G. White, dia matetika no niantso hoe: "Voninahitra... voninahitra... voninahitra voninahitra," satria izany no teny tokana toa mahalaza indrindra ny zavatra hitany. Ary koa, ireo zava-manana aina efatra dia tsy mitsahatra andro aman'alina manao hoe: "Masina, masina, masina ny Tompo Andriamanitra Tsitoha, Ilay taloha sy ankehitriny ary ho avy."-Apôk . 4:8.
Marina tokoa fa madio sy masina Andriamanitra, ary toy izany no tsy maintsy ahitantsika Azy rehefa manatona Azy isika. Nahoana no mampahery anao ny fahafantarana izany? Manainga anao hanao inona izany raha ny toetranao no jerena?