NY SAFIDY TSARA INDRINDRA FAHAROA
Vakio ny Eks. 17:7-13 sy ny Jos. 6:15-20. Inona по fitoviana hitanao eo amin'ireo tantara roa miresaka ady ireo? Inona no maha-samy hafa azy ireo?
Ny ady voalohany nataon'ny Isiraely taorian'ny nanafahana azy tamin'ny fanandevozana dia voarakitra ao amin'ny Eks. 17, izay niarovan'ny Isiraelita ny tenany tamin'ny Amalekita. Efa nahita ny herin'Andriamanitra tsy manarn-petra ny Isiraely tamin'ny namelezany ny Egyptianina sy nanafahany ny Isiraelita. Efa hitantsika fa tsy ny hiadian'ny Isiraely amin'ny hafa no drafitr Andriamanitra ho azy tany am-boalohany (Eks. 23:28; Eks. 33:2). Saingy fotoana fohy taorian'ny nanafahana azy ireo tany Egypta, dia nanomboka nimonomonona teny an-dalana ny Isiraelita (Eks. 17:3), ary nisalasala ny amin'ny fanatrehan'Andriamanitra mihitsy aza. Tamin'io fotoana io no tonga niady tamin'ny Isiraely ny Amalekita. Tsy kisendrasendra izany. Navelan'Andriamanitra hanafika ny Isiraely ny Amalekita mba hianaran'izy ireo mitoky Aminy indray.
Tsy nanitsakitsaka ny fitsipiny Andriamanitra raha nidina teo amin'ny laharan' ny olony, ka tsy nitsahatra niantso azy ireo mba hiverina amin'ny drafiny ho azy ireo: dia ny fianteherana sy ny fitokiana tanteraka amin'ny fidiran'Andriamanitra an-tsehatra. Raha ny marina, tsy nomena ny lalan'ny ady (Deo. 20) raha tsy taorian'ny 40 taona tany an'efitra, izay vokatry ny tsy finoan'ny Isiraely koa. Nitaky paikady vaovao ny toe-javatra vaovao, ary tamin'izany ihany no nitakian'Andriamanitra ny Isiraely handringana tanteraka ny Kananita (Deo. 20:16-18).
Nanjary nila niady ny Isiraely, ary ankoatra izany dia nanjary fizahan-toetra ny fahatokian'izy ireo tamin'i Jehovah koa izany. Tsy nanary azy ireo Andriamanitra fa navelany hanatri-maso ny heriny ny Isiraelita tamin'ny alalan'ny fianteherana tanteraka Taminy.
Hita mazava ao amin'ny tsoa-kevitra nataon'i Josoa any amin'ny faran'ny boky fa nandray anjara tamin'ny fahazoana ny fandresena ny Isiraelita. Voalaza fa niady tamin'ny Isiraelita ny Kananita (Jos. 24:11). Na vokatry ny fahagagana avy amin'Andriamanitra aza ny firodanan'ny mandan'i Jeriko, dia tsy maintsy nandray anjara mavitrika tamin'ny ady ny vahoaka Isiraely sy niatrika ny fanoherana mafy nataon'ny mponin'ilay tanana.
Nanjary fomba iray nampitomboana ny fitokiana tsy misy fepetra tamin'ny fanampian'i Yahweh ny fandraisan'ny Isiraely anjara tamin'ny ady mitam-piadiana. Na izany aza, nampahatsiahivina hatrany ny Isiraely (Jos. 7:12,13; Jos. 10:8) fa teo am-pelatanan'ny Tompo ny fahombiazan'ny ady tsirairay, ary ny hany mety hampiova ny vokatry ny ady dia ny finoany, na ny tsy finoany ny teny fikasan'ny Tompo. Anjaran'izy ireo ny misafidy.