NY FIRENENA REHETRA: FIZARANA 2Hodinihina mandritra ny herinandro: Gen. 2:9-17; Dan. 2:31-35; Isa. 17:12, 13; Dan. 7:1-3; Rôm. 3:10-19; Apôk. 12:15,16; Apôk. 10:1-11.
Tsianjery: "Mitsahara, ka aoka ho fantatrareo fa Izaho no Andriamanitra; hisandratra amin'ny firenen-tsamy hafa Aho, hisandratra amin'ny tany Aho." Sal. 46:10.
Nandritra ny taonjato maro dia nisy olona nilaza fa nirin'Andriamanitra N mihitsy ny Fahalavoana, ka fikasany ny hahalatsaka ny olombelona ao amin'ny fahotana sy ny fahafatesana, mba hahatonga Azy tsy maintsy ho faty- ao amin'ny Tenan'i Jesôsy - eo amin'ny hazo fijaliana. Ahoana rahateo moa no ahafahany mampiseho ny halalin'ny fitiavany ny olombelona amin'ny fomba mahery vaika sy mazava raha tsy amin'ny fahafatesany teo amin'ny hazo fijaliana ho azy ireo? Toy izao ilay hevitra raha fintinina: nilain'Andriamanitra ny fahalavoan'ny olombelona.
Mamohehatra sady mahonena izany fiheverana izany. Tsy tao anatin'ny fikasan'Andriamanitra velively ny hahalavo an'i Satana na ny olombelona.Toe-javatra mampalahelo nahatonga loza lehibe tokoa ny fikomian'i Satana, avy eo ny olombelona, ary ho tsy nisy nanombinana ny fahasambarantsika tao amin'Andriamanitra raha tsy lavo ny ray aman-drenintsika voalohany.
Mbola hodinihintsika amin'ity herinandro ity ireo olana nateraky ny Fahalavoana sy ny faniriana fitondram-panjakan'olombelona fa tsy ny an'Andriamanitra. Aseho amin'ny fomba miezinezina ao amin'ny bokin'i Daniela izany fahamarinana izany, izay mampiseho fa marina Andriamanitra rehefa nampitandrina ny vahoakany momba izay hitranga rehefa miala Aminy izy ireo ka misafidy mpanjaka eto an-tany. Azon'izy ireo tokoa izay nangatahiny: mpanjaka eto an-tany, mpanota manjaka amin'ny mpanota - tsy tsara na oviana na oviana io fitambarana io.
*Famerenana ny lesona ny sabata 03 Mey.