FIHAIKANA TEO AMIN'ILAY TANY
Vakio ny Jos. 13:1-7. Na dia fanomezana avy amin' Andriamanitra aza ny tany Kanana, inona ireo fihaikana teo anatrehan'ny fakana izany?
Satria andevo nandritra ny taonjato maro ny Isiraelita, dia tsy nanana fahaiza-manao ara-tafika ampy mba hakana ny tany izy ireo. Na ireo Egyptianina izay nampanompo azy aza anefa dia tsy nahavita nisahana manontolo ny fifehezana io tany io nandritra ny fotoana naharitra, kanefa izy ireo nanana fahaiza-manao sy fitaovana ara-tafika ampy. Tsy mbola nandresy tanteraka an'i Kanana ireo Egyptianina noho ireo tanana mimandany sarotra anihina. Izao dia firenena iray nandevozina teo aloha no asaina maka ny tany izay tsy hain'ny tompon'izy ireo teo aloha nofehezina. Raha ho azon'ireo izany tany izany, dia noho ny fahasoavan'Andriamanitra irery ihany fa tsy noho ny ezaka ataony manokana.
Miresaka momba ny fizarana ny tany amin'ireo foko samy hafan'ny Isiraely ny Jos. 13 hatramin'ny toko faha-21. Izany fizarana ny tany izany dia milaza amin'ny Isiraely ny faritany notendrena ho azy ireo sy ireo tany mbola tokony halainy ho azy koa. Azon'ny Isiraelita atao izao ny hiaina amim-pilaminana eo amin'ny tany izay efa nomen Andriamanitra ho lovan'izy ireo. Izy ireo no nomena zo ara-dalána honina eo amin'ilay tany, saingy Andriamanitra no tena tompon'izany. Tsy maintsy mifanandrify amin'ny fanapahan-kevitr Andriamanitra kosa ny valintenin'ny olombelona. Asehon'ny tapany voalohany amin'ny bokin'i Josoa ny fomba nanomezan'Andriamanitra ny tany tamin'ny nandroahany ireo Kananita; ny tapany faharoa indray dia mitatitra ny fomba nakan'ny Isiraely ny tany tamin'ny alalan'ny fonenan'izy ireo tao.
Maneho an-tsary ny famonjena antsika izany dingana samihafan'ny fakana ny tany Kanana izany. Tahaka ny Isiraely dia tsy mahay manao na inona na inona mba hahazoam-pamonjena isika (Efes. 2:8,9). Fanomezana izany, tahaka ilay tany izay fanomezan Andriamanitra ho an'ny Isiraely araka ny fifandraisan'izy ireo Aminy izay miorina amin'ny fanekena. Azo antoka fa tsy niorina tamin'ny fahamendrehan'izy ireo izany (jereo ny Deo. 9:5).
Mba hahafahan'ny Isiraelita mahazo tombontsoa avy amin'io fanomezan Andriamanitra io anefa, dia tsy maintsy noraisin'izy ireo ny andraikitra rehetra nifandraika tamin'ny fonenana teo amin'ny tany, tahaka antsika izay tsy maintsy mandalo amin'ny dingan'ny fanamasinana amin'ny alalan'ny fankatoavana amim-pitiavana ireo fitakiana mifandraika amin'ny maha-olom-pirenen'ny fanjakan Andriamanitra. Na dia zavatra tsy mitovy aza, dia misy teboka ifanakaikezany ihany eo amin'izy ireo, izay nomena ny tany noho ny fahasoavana, sy isika izay omena famonjena noho ny fahasoavana. Fanomezana mahatalanjona no natolotra antsika, kanefa mety ho verintsika izany raha toa isika manao tsirambina izany.
Ahoana no iatrehan'ny Kristianina ankehitriny ireo fihaikana sahala amin’izay natrehin'ny Isiraelita tamin'ny fakana ny Tany Nampanantenaina? Jereo ny Fil. 2:12; Heb. 12:28.