NY JOBILY
Nanan-danja ho an'ny fisian'ny Isiraely amin'ny maha vahoakan'Andriamanitra azy ireo ny tany ka tsy nozaraina indray mandeha ho an'olom-bitsy ihany izany, fa tsy tsy maintsy nozaraina isam-pirenena sy isam-poko ary isam-pianakaviana (Nom. 34:13-18) mba tsy hahatonga azy ho fananan'ny mpitarika vitsivitsy ihany.
Vakio ny Lev. 25:1-5, 8-13. Inona no tanjon'ny taona sabata sy ny jobily?
Tany Egypta, dia namoy mandrakariva ny taniny ny vahoaka ary tonga mpanompon'i Farao. Tsy tahaka izany kosa ny fikasan'Andriamanitra ho an'ny Isiraelita satria tiany izy ireo raha manana ny zony sy ny tombontsoany. Tsy nisy olon-kafa, ankoatra ny foko sy ny fianakaviana izay nomena ny tany hatrany am-boalohany, afaka naka izany ho an'ny tenany. Raha ny marina, araka ny drafitr'Andriamanitra, dia tsy natao hamidy amin'ny heviny ara-bakiteny mihitsy ny tany; azo natao ny nampanofa izany arakaraka ny tombambidiny izay niankina tamin'ny isan'ny taona tavela mandra-pahatonga ny jobily manaraka. Araka izany, ny havan'ny olona izay voatery "nivarotra" ny tanin-drazany dia nanana adidy ny hanavotra izany na dia tsy mbola tonga aza ny jobily (Lev. 25:25).
Manjary ahitana taratra ny toetran'Andriamanitra sy ny soatoaviny ny fizarana ny tany. Amin'ny maha-Raintsika any an-danitra Azy, dia iriny raha halala-tanana amin'ireo mahantra noho izy ny zanany ka hamela ny tanin'izy ireo hamelona azy ireny isaky ny taona fahafito. Ny taona sabata dia nampihatra ny fitsipika ao amin'ny didy momba ny Sabata amin'ny lafiny mivelatra kokoa. Tsy nanome tombambidy sy nampirisika ny filofosana amin'ny asa fotsiny ny fananana ny tany fa niantso koa ho amin'ny fanajana sy ny fanehoana halemem-panahy amin'ireo tojo olana ara-toe-karena.
Ny fitsipika mikasika ny fananan-tany dia nanome tombontsoa ny Isiraelita tsirairay ho afaka amin'ireo toe-javatra mampahory izay nolovainy na koa vokatry ny nataony, ka nahafahany nanao fiaingana vaovao teo amin'ny fiainany.
Raha ny marina, dia izany no tena ivon'ny filazantsara sy tanjona kendreny: ny hamafa ny fahasamihafana misy eo amin'ny mahantra sy ny manan-karena, ny mpampiasa sy ny mpiasa, ireo mahazo tombontsoa sy ireo fadiranovana, ka hametraka ny olona rehetra eo amin'ny toerana iray mitovy amin'ny alalan'ny fanekena fa ilaintsika tanteraka ny fahasoavan'Andriamanitra.
Indrisy anefa fa nataon'ny Isiraely tsirambina ny fitandremana ny fenitra napetrak' Andriamanitra ka tanteraka ireo fampitandremana momba ny fandroahana azy ireo hiala amin'ny tany taonjato vitsivitsy taty aoriana (2 Tant. 36:20,21).
Ahoana no ampahatsiahivan'ny fitsipika momba ny fizaran-tanin'ny Isiraelita sy ny Sabata fa mitovy isika rehetra eo imason' Andriamanitra? Ahoana no anampian'ny Sabata antsika hanao "tsia" manoloana ny fanararaotana sy ny fandrisihana tsy misy farany ny olona hamokatra sy hividy, tranga izay mahakasika ny flaraha-monina maro ankehitriny?