Na eo aza ireo famelezan'ny fahavalo dia hahatratra ny fetra ambony indrindra be voninahitra ny asan'Andriamanitra. Hotorina "amin'izay monina ambonin'ny tany sy amin'ny firenena sy ny fokom-pirenena sy ny samy hafa fiteny ary ny olona rehetra" ny filazantsara (Apôk. 14:6). Hifarana amin'ny fandresen'i Kristy tanteraka ny herin'ny helo ny fifanandrinana lehibe eo amin'i Kristy sy i Satana. Handresy ny ratsy ny fanjakan'Andriamanitra ary ho foana mandrakizay eto amin'izao tontolo ary rehetra izao ny fahotana. Ny Apôk. 11 dia miantomboka amin'ny fiezahan'i Satana, tamin'ny alalan'ny Revolisiona frantsay, hamotika ny finoana kristianina sy hanafoana ny finoana an'Andriamanitra, saingy mifarana amin'ny fandresen'ny fanjakan'Andriamanitra ireo fanapahana sy ny herin'ny ratsy io toko io. Fampaherezana ho an'ireo rehetra mandalo fizahan-toetra mafy noho ny amin'i Kristy sy ny fahamarinany izany.
Vakio ny Apôk. 11:15-18. Araka ireo andininy ireo, inona ireo toe-javatra hisy amin'ny fiafaran'izao tontolo izao, rehefa haneno ny trompetra fahafito?
Tonga fanjakan'ilay Tompontsika ireo fanjakana eto amin'ity tany ity. I Kristy no mpandresy. Resy ny ratsy. Mandresy i Jesôsy ary resy i Satana. Mandresy ny marina. Manjaka ny fahamarinana. Tsara ny hanarahantsika ity torolalana manaraka ity: "Na inona na inona aorina amin'ny fahefan'olombelona dia ho rava; fa izay rehetra miorina amin’ilay vatolampin'ny tenin'Andriamanitra tsy miova dia haharitra mandrakizay."- HM, t. 298.
Vakio ny Apôk . 11:19. Inona no hitan'i Jaona nisokatra tany an-danitra? Ary Inona no hitany rehefa niandrandra ny lanitra izy?
Nisokatra teo imason'i Jaona ny tempolin'Andriamanitra any an-danitra. Nahita ny fiaran'ny fanekena izy rehefa nibanjina ny efitra masina indrindra. Tao amin'ny Fitoerana Masina ao amin'ny Testamenta Taloha izay mitovy amin'ny modely lehibe any an-danitra, ny fanatrehan'Andriamanitra be voninahitra dia naseho teo anelanelan'ireo sarin'anjely namboarina teo amin'ny rakotry ny fiaran'ny fanekena. Tao anatin'ny fiara no nisy ny lalan'Andriamanitra. Na dia vonjena amin'ny fahasoavana amin'ny alalan'ny finoana irery ihany aza isika, ny fankatoavana ny didin'Andriamanitra kosa dia maneho raha tena marina ny finoantsika. Ny lalàn'Andriamanitra no fototra na fenitry ny fitsarana (Jak. 2:12). Tonga manan-danja manokana sy mazava izany toe-javatra izany amin'ny fiafaran'izao tontolo izao (jereo ny Apôk. 12:17; Apôk. 14:12).
Ahoana no ambaran'ny fifanoherana manaitra eo amin'ny tsy finoana an'Andriamanitra tao anatin'ny Revolisiona frantsay sy ny fiafarana be voninahitra voalaza ao amin'ny Apôk. 11 amintsika?