Vakio ny Mar. 2:1-12. Inona no notadiavin'ilay mararin'ny paralysisa raha nentina ho eo amin'i Jesôsy izy? Ary inona no azony?
Malemy tsy afa-mihetsika ity lehilahy ity, koa ny namany efa-dahy no tsy maintsy nitondra azy ho eo amin'i Jesôsy. Rehefa nanongotra ny tafon-trano izy ireo mba hampidinana ny namany marary marary h ho amin'i Jesôsy, dia hitan'i Jesôsy eo ny finoan'ireo, araka ny voalaza ao amin'ny Mar. 2:5. Mety ho hita maso ve ny finoana? Tahaka ny fitiavana dia hita amin'ny asa atao izany. Eto dia hita mazava ny fikirizan'ireto namany efa-dahy ireto.
Miharihary fa fahasitranana ara-batana no notadiavin'ilay lehilahy. Raha vao tonga teo anatrehan'i Jesôsy anefa izy dia teny manambara famelan-keloka no notononin'i Jesõsy voalohany. Tsy niteny na indraim-bava aza ilay lehilahy mandritra ny tantara manontolo. Ireo mpitondra fivavahana kosa no nanao fanamarihana (tao an-tsainy) momba ny teny nolazain'i Jesôsy. Fitenenan-dratsy an'Andriamanitra no nandraisan'izy ireo ny tenin'i Jesôsy, ary fakana ny fahefana izay an'Andriamanitra irery ihany.
Ny fomba fanehoan-kevitra fampiasan'ny raby ihany no namalian'i Jesôsy ireto mpanohitra Azy ireto, dia ilay hoe: "Iza no moramora kokoa (...)" - Mar. 2:9, izay miainga amin'ny moramora kokoa ho amin'ny sarotsarotra kokoa. Zavatra iray ny milaza amin'ny olona hoe voavela ny helony, ary zavatra iray hafa koa ny mampitsangana sy mampandeha olona iray mararin'ny paralysisa. Satria hain'i Jesôsy ny manasitrana ilay lehilahy amin'ny herin'Andriamanitra, dia voamarina ny fanambarany fa mahavela heloka tokoa Izy.
Vakio ny Mika 6:6-8. Ahoana no anazavan'ireo andininy ireo ny fifanolanana teo amin'i Jesôsy sy ireo mpitondra fivavahana?
Hadinon'ireto mpitarika fivavahana ireto ny tena zava-manan-danja marina, dia ny manao ny marina sy ny tia famindrampo ary ny manaraka an'Andriamanitra amin'ny fanetren-tena. Seriny loatra izy ireo nanamarina ny fahafantarany an'Andriamanitra, hany ka jamba tsy nahita ny asan'Andriamanitra niseho teo ambanin'ny masony. Tsy misy milaza ao amin'ny lahatsoratra fa niova ny fisainan'izy ireo momba an'i Jesôsy, na dia rehefa avy nanome porofo mazava aza i Jesôsy mba hahafantaran'izy ireo fa avy amin'Andriamanitra Izy. Tsy vitan'ny hoe nataon'i Jesôsy izay nahafantarany fa mahay mamaky ny ao an-tsainy Izy (izay zavatra tsy mora), fa nositraniny teo imason'izy ireo koa ilay mararin'ny paralysisa, tamin'ny fomba izay tsy azony nolavina.
Ahoana no hitandremantsika mba tsy ho latsaka amin'ny fandrika izay nahazo ireto olona ireto, mba tsy ho seriny loatra amin'ny fombafombam- pivavahana ka manadino ny tena zava-dehibe ao amin'ny fivavahana marina (Jak. 1:27)?