Hodinihina mandritra ny herinandro : Apôk. 14:6-12; Mpitt. 12:13, 14; Ohab. 28:9; Dan. 7:25.
Tsianjery: "Dia tezitra tamin'ilay vehivavy ny dragona ka lasa nandeha hiady tamin'ny zanany sisa, izay mitandrina ny didin'Andriamanitra sy mitana ny filazana an'i Jesôsy." – Apôk. 12:17.
Tamin'ny alalan'ny fandinihana lalina ny Baiboly no nahatakaran'ny Advantista ny hevitry ny lalàna ao amin'ny efitra masina indrindra ao amin'ny Fitoerana Masina any an-danitra. Tamin'ny fandinihana ny ivon'ny lalàn'Andriamanitra no nahitan'izy ireo koa ny hevitry ny Sabata, ny didy fahefatra. Raha ny marina, io didy io, ambonin'ny hafa rehetra, no manondro mazava an'Andriamanitra ho Mpamorona antsika, ilay fanorenan'ny fiankohofana marina rehetra – lohahevitra izay hisongadina manokana amin'ny andro farany amin'ny tantaran'ny tany (jereo ny Apôk. 14:6-12).
Tanjon'i Satana hatrany am-piandohana ny handrava ny fiankohofana amin'Andriamanitra amin'ny alalan'ny famelezana ny Lalany. Fantany fa izay diso "amin'ny iray loha" dia "meloka amin'ny rehetra" (Jak. 2:10); noho izany dia mampirisika ny olona izy handika ny lalàn'Andriamanitra. Halan'i Satana ny Sabata satria mampahatsiahy ny olona ny Mpamorona sy ny fomba tokony hiankohofana Aminy. Voarakitra ao amin'ny lalàn'Andriamanitra koa izany, ao amin'ny efitra masina indrindra any an-danitra. Satria ny lalana no mamaritra ny fahotana, raha mbola miezaka ny ho mahatoky amin'Andriamanitra ny olona dia tokony hanan-kery hatrany ny Lalàny, ao anatin'izany ny didy momba ny Sabata.
Ny tanjon'ity lesona ity dia ny haneho ny fifandraisana misy eo amin'ny Fitoerana Masina, ny lalàn'Andriamanitra, ny Sabata ary ny fotoan-tsarotra ho avy izay mifandraika amin'ny mariky ny bibidia. Hodinihintsika ihany koa ny lanjan'ny Sabata ho an'ny taranaka amin'ny andro farany.