Miasa amin'ny alalan'ny fisainantsika ny Fanahy Masina. Manasa antsika Izy handinika ireo zava-miafin'izao tontolo ary rehetra izao. Mifanaraka amin'izany indrindra ny voalazan'ilay olona iray izay hoe: "Amin’ny maha-Kristianina antsika dia tsy ajanontsika eo am-baravaran'ny fiangonana ny atidohantsika." Kanefa na maranitra toy inona aza ny sain'ny olombelona, raha amin'ny herin'ny tenany monja dia tsy ho hainy ny hahatakatra ireo fahamarinan'Andriamanitra ao amin'ny Soratra Masina. Tsy hevitr’olombelona mantsy ny fahamarinana. Fanambaran'Andriamanitra izany.
Vakio ny Ohab. 16:25, Mpits. 21:25, sy ny Isa. 53:6. Inona no ambaran'ireo momba ny paikady entin'i Satana mamitaka?
Anisan'ny famitahana mahomby indrindra ataon'ny devoly ny mitarika antsika hino fa ny fomba fisainan'olombelona tsy ampian'ny Fanahy Masina sy tsy mahazo fahalalana avy amin'ny Tenin'Andriamanitra dia ampy hahatakarana ny sitrapon'Andriamanitra. Mety hisy lalana toa tsara eo imasontsika, na amin'ny kolontsaina iray manontolo koa aza, kanefa mety ho diso tanteraka eo imason'Andriamanitra.
Taona vitsivitsy lasa izay dia nanapa-kevitra izaho sy ny vadiko hitsangantsangana any amin'ny ala nanakaiky ilay hôtely natorianay. Mahay lalana aho amin’ny ankapobeny, ary raha mandeha mandritra ny adiny iray eo aho, manaraka lalana isan-karazany, dia matoky fa tsy ho sarotra amiko ny hahita ny lalana mody; saingy vetivety foana dia hitanay fa very tanteraka tao an'ala izahay. Nilentika ny masoandro ary nanahy ny ratsy indrindra aho. Soa fa nahita mpitsangantsangana hafa izay mahalala ny lalana izahay. Teo amin'ny 8 kilômetatra niala ny lalana no nisy anay, saingy tsy lavitra anay teo ny lalambe. Ary satria nijanona teo akaiky teo ny fiaran'izy ireo dia nanolo-kevitra ny hanatitra anay tany amin'ilay hotely izy ireo. Nanova zavatra tokoa ny nahitana olona nahafantatra ny lalana sy afaka nitondra anay ho any amin'izay tokony halehanay.
Tsy namela antsika ho irery Andriamanitra teo amin'ny diantsika eto an-tany mankany an-danitra. Manondro antsika ny Soratra Masina, Izay mitarika antsika hody, ny Fanahy Masina. Tsy mety ho takatsika araka ny tokony ho izy ny marina sy ny diso, ny mety sy ny tsy mety, ny tsara sy ny ratsy — raha tsy hazavain'ny Tenin'Andriamanitra. Izay manohitra an'Andriamanitra sy ny Teniny dia fahadisoana, ary mampidi-doza mandrakariva ny fahadisoana; izay mifandrindra amin'Andriamanitra kosa dia fahamarinana sy fahatsarana. Zava-dehibe ny hanaovantsika ny Tenin'Andriamanitra ho mpitsara antsika farany ny amin'ny fahamarinana sy ny fitondran-tena.
Nahoana ny sain'olombelona no tsy mahita ny fahamarinan'Andriamanitra raha tsy misy fanampiana avy amin'ny Fanahy Masina? Ifanakalozy hevitra ny amin'ny fifandraisana misy eo amin'ny fomba fihevitr'olombelona sy ny fanambaran'Andriamanitra. Ahoana no tena anampian'ny faharanitan-tsaintsika hahatakatra ny fanambaran'Andriamanitra? Ohatra, jereo ny Dan. 2, faminaniana izay mahafaoka ny tantaran'izao tontolo izao hatramin'ny andron'i Babilona ka hatramin'ny hoavy. Nahoana no tena ilana ny fahaiza-mandiniky ny olombelona tokoa ny karazana faminaniana tahaka izany?