Vakio ny Mar. 4:21-23. Inona ny zavatra asongadin'i Jesôsy ao amin'ny fanoharana momba ny jiro?
Samy nanana ny habeny sy ny endriny ny trano tany amin'ny faritra nisy an'i Jesôsy tamin'ny androny; arakaraka ny toerana nisy ny trano sy ny haren'ny tompony izany. Nanaraka ny fomba fanorenana trano grika izany, izay nanorenana trano manodidina ny tokotany iray, saingy samihafa ny endriny. Azo heverina koa anefa fa miresaka momba ny trano kely kokoa an'ny tantsaha i Jesôsy. Na trano lehibe izany na kely, dia izao no foto-kevi-dehibe tiana hambara: indray andro any dia hiseho ny fahamarinana momba an'i Jesôsy.
Mametraka fanontaniana roa i Jesôsy ao amin'ny Mar. 4:21. Valinteny mitory fandavana no andrasan'ny fanontaniana voalohany - "Moa entina va ny jiro mba hosaronan'ny vata famarana, na hatao ao ambanin'ny farafara?" "Eny" kosa no valinteny andrasan'ny fanontaniana faharoa manao hoe: "Tsy hatao eo amin'ny fanaovan-jiro va izy?" Toe-javatra toa tsy manaraka ny lôjika, na mahatsikaiky mihitsy aza, no anehoan'i Jesôsy ny hevitra tiany hambara. Natao hitondra fahazavana ny jiro, raha tsy izany dia foana ny antom-pisiany. Hazavain'ny Mar. 4:22 io fanoharana io ka tondroiny amin'izany ny tsiambaratelo izay aharihary ampahibemaso. Fantatry ny olona izay niharan'ny hosoka teo amin'ny mailaka na ny solosaina ampiasainy izany hoe manana tsiambaratelo nanjary miharihary ampahibemaso! Ny filazantsara anefa no resahin'i Jesôsy eto.
Vakio ny Mar. 4:24,25. Inona ny lesona ampianarin'i Jesôsy amin'ny alalan'ny fanoharana momba ny vata famarana?
Amidy eny an-tsena ankalamanjana ny entana vaovao any amin'ny faritra maro eto an-tany. Manana fitaovana famarana ny entana amidiny ny mpivarotra. Fomba fanaon'ny mpivarotra tahaka izany ny manampy kely amin'ilay entana mba hahatsapan'ny mpividy fa nomena fahafaham-po izy. Noraisin'i Jesõsy ny fomba fanaon'ny mpivarotra tsara amin'ny mpividy mba hampitana hevitra mikasika ny fandraisana ny fahamarinana. Raha mandray sy manaraka ny fahazavana ny olona dia hahazo mihoatra noho izay ananany aza. Raha mandà ny fahazavana kosa izy dia na ny kely ananany aza hesorina aminy.
Ahoana no hianarantsika bebe kokoa ny fitsipika momba ny hamarana ny olona araka ny famarana ampiasainy? Eritrereto izany eo amin'izay rehetra ataonao amin'ny hafa.