"Manana Mpisoronabe toy izany isika, dia Ilay efa mipetraka eo amin'ny ankavanan'ny seza fiandrianan'ny Avo Indrindra any an-danitra, Mpanao fanompoam-pivavahana ao amin'ny fitoerana masina sy ny tena tabernakely, izay naorin'ny Tompo, fa tsy olona." - Heb. 8:1,2.
Mofon’aina:
Tsy hain'ny maso ara-nofo velively ny mibanjina ny fahatsaran’i Kristy. Ny Fanahy Masina Izay manazava ny ati-fanahy irery ihany - ka mampiharihary ny tsy fananan'ny fanahy fanantenana na hery raha tsy misy ny famindrampo sy ny famelan-keloka avy amin'Ilay mpitondra ny otantsika, Ilay ampy ho antsika — no afaka mampahita ny olona ny famindrampony mandrakizay, sy ny fitiavany tsy misy fetra, ary ny fahatsarany sy ny voninahiny.
Tsy mbola nisy velively nahatanteraka iraka lehibe toy ny Mpamonjintsika teto an-tany, nomban'ny fahasoavana, fiantrana tsy misy fetra, fitiavana tsy hay lazaina; ary tsy nisy olona koa natao toy izay nanaovana Azy teo an-tanan'ny olona lavo. "Fa olom-boavidy hianareo; ka dia mankalazà an 'Andriamanitra amin 'ny tenanareo." — 1 Kôr. 6:19,20. (...) I Kristy irery no Olona tsy manan-tsiny niaritra fahoriana, fahafaham-baraka sy henatra, ary fandavana noho ny amintsika. (...)
Koa ahoana no tokony ho fitondran-tenantsika — izay tonga olom-baovao ao amin'i Kristy Jesôsy sy novonjena tamin'ny alalan'ny fahamendrehany eo anatrehan'ny lanitra manontolo? Himonomonona ve isika? Hifampiam-panga? Tsy toetra malemy fanahy sy milefitra ve no mety kokoa? (Mat. 11:29,30). (...)
Raha mba hitan'ny rehetra mantsy i Kristy eo anoloan'ny seza fiandrianana, miandry ny vavaka ataontsika, miandry antsika hampilefitra ny sitrapontsika, hampitsahatra ny fikomiantsika sy hiverina ho amin'ny fankatoavana an'Andriamanitra, dia ho amim-pibebahana manao ahoana no hivavahantsika amin'ny Ray mba hamelany ny helotsika noho ny fandikantsika ny lalàny, sy noho ny hery miasa mangina ratsy avy amintsika, izay nahatonga ny hafa hanao tsinontsinona ny lalàn'i Jehôvah! Mihoby ny tafiky ny fahavalo noho ny fangatahantsika andro. (...) Izao anio izao, hanaiky ho mpiara-miasa amin'i Kristy ve isika, Izay mifona ho antsika manokana eo anatrehan'ny Ray? Mbola hazonin'ny anjely tsy hihatra ny fandringanana satria mihevitra fatratra ny amin'ireo zanaka mpikomy izy ireo, te hamerina azy ho ao am-bala (...), mba ho mpandresy sy voavonjy mandrakizay miaraka amin'ny ankohonan'Andriamanitra any an-danitra izy ireo. — UL, t. 155.