Vakio ny Jao. 14:5,6. Inona ny fanontaniana napetrak'i Tômasy momba ny toerana halehan' i Jesôsy? Inona no navalin'i Jesôsy azy?
Toa mitombina ihany ny fanontanian'i Tômasy. Raha tsy fantatrao izay alehan'ny olona iray, ahoana moa no hahafantaranao ny lalana hanarahana izany olona izany? Namaly i Jesôsy fa ny Tenany no làlana. Làlana mankaiza? Mankany amin'ny Ray. Asongadina ao amin'ny fitarihan-teny (Jao. 1:1-18) fa mifamatotra akaiky ny Teny (logos), i Jesôsy Kristy, sy ny Ray.
Voalaza ao amin'ny Jao. 1:18 fa ny Zanakalahy Tokana no nanambara ny Ray. Ny hoe "nanambara" eto dia avy amin'ny matoanteny grika hoe exēgeomai, izay midika hoe "manazava, mampiharihary". Avy amin'izany no ahazoana ny teny hoe exegesis, izany hoe mamoaka ny heviny. Araka izany, i Jesôsy Kristy no rohy mampifandray amin'ny Ray; Izy no manazava sy mamoaka ny hevitry ny Ray amin'izao tontolo izao lavo. Noho izany dia Izy no lalana mankany amin'ny Ray. Raha tsy misy Azy dia voafetra ny fahatakarantsika.
Vakio ny Jao. 14:7-11. Ahoana no nanazavan'i Jesôsy ny sain'i Filipo tao anatin'ny fahadisoan-keviny?
Nangataka mba hampisehoana ny Ray i Filipo. Zavatra tsy hain'ny olombelona atao na zakaina izany mahita ny Ray izany (ampitahao amin'ny Eks. 33:17- 34:9, Jao. 1:18). Nanome tsiny ny tsy fahatakarany i Jesôsy nanao hoe: "Izay nahita Ahy dia nahita ny Ray" - Jao. 14:9. Koa mazava tsara fa lalana mankany amin'ny Ray tokoa i Jesôsy. Izy no fahazavana manazava ny lalana mankany amin'Andriamanitra. Raha tsy eo Izy dia maizina sy tsy azo antoka ny lalana.
Natambatr'i Jesôsy ireto teny telo ireto: lalana, fahamarinana, ary fiainana. Ankoatra ny ao amin'ny Jao. 14:6 dia indray mandeha ihany no ampiasana ny hoe "lalana", ao amin'ny Jao. 1:23, momba an'i Jaona manomana ny lalana ho an'i Jesôsy. Ny fahamarinana sy fiainana kosa dia lohahevi-dehibe ao amin'ny filazantsara. Hifantoka manokana amin'ilay lohahevitra manan-danjan'ny fahamarinana ny lesontsika Alarobia sy Alakamisy, indrindra eto amin'ity tontolo ity, izay mampisalasala be ihany ny famaritana ny atao hoe "fahamarinana".
Nahoana no mampahery tokoa ny mahafantatra fa i Jesôsy no fanambarana tsara indrindra ananantsika eto momba ny Ray sy ny toetrany?