"Dia hampifandrafesiko hianao sy ny vehivavy ary ny taranakao sy ny taranany: izy hanorotoro ny lohanao, ary hianao kosa hanorotoro ny ombelahin-tongony." — Gen. 3:15.
Mofon’aina:
Tamin'ny fotoana nihintsanan'ny ravin-kazo sy ny felamboninkazo no nahitan'i Adama sy ilay mpanampy sahaza azy ny famantarana voalohan'ny fahalovana. Nazava sy velona tao an-tsainy ny zava-misy marina fa ny zava-manana aina rehetra dia tsy maintsy ho faty. Eny fa na ny rivotra izay niankinan'ny fiainany aza dia nitondra ny voan'ny fahafatesana. (…)
Nijoro ho mpanjaka teo anatrehan'ny voary teo ambany fifehezany i Adama raha nitoetra ho mahatoky tamin'Andriamanitra, ary nanaiky ny fahefany izao rehetra izao; saingy rehefa tsy nankatò izy dia very izany fahefana izany. (...) Tsy ny fiainan'ny olombelona ihany, araka izany, no mitantara ny les ona mahonena mikasika ny fahalalana ny ratsy, fa ny toetry ny biby koa, ny hazo any an'ala, ireo ahitra eny an-jaridaina ary indrindra fa ny rivotra izay iainana.
Tsy nafoy anefa ny olona manoloana ny vokatry ny safidy ratsiny. (...) "Dia hampifandrafesiko hianao sy ny vehivavy ary ny taranakao sy ny taranany: izy hanorotoro ny lohanao, ary hianao kosa hanorotoro ny ombelahin-tongony." - Gen. 3:15.
Ny didim-pitsarana notononina ho ren'ireo razambentsika dia nanjary teny fikasana ho azy. Nomena fehezanteny tsy latsa-danja amin'ny fanantenana izy ireo talohan'ny nandrenesany ny amin'ny tsilo sy ny hery, ny hasasarana sy ny alahelo izay tsy maintsy hihatra taminy, na ny vovoka izay tsy maintsy hiverenany. (...)
Averin'ny zavaboary amintsika koa izany fanambarana izany. Na eo aza ny fanimbana ataon'ny fahotana dia tsy ny famoronana ihany no asehon'ny zavaboary fa ny fanavotana koa. (...) Ma-nintsana ny raviny ireo hazo mba ho voarakotra indray amin'ny ravina vaovao maitso mavana; malazo ny voninkazo mba hamoaka hatsaran-tarehy vaovao indray; ary ny fanehoana hery hoenti-mamorona tsirairay dia antoka ho antsika fa mbola hohavaozina indray isika amin'ny "fahitsiana sy ny fahamasinana momba ny fahamarinana" - Efes. 4:24. (...)
Arakaraka ny hipariahan'ny ratsy no ahenoana ny feon'Ilay Raintsika milaza amin'ireo zanany mba hijery ny toetry ny fahotana eo amin'izay vokatr' izany, ary koa mampitandrina azy hahafoy ny ratsy sy manasa azy hanaiky ny tsara. — Fk, tt. 22-24.