"Koa tandremo tsara izay fandehanareo, mba tsy hitondranareo tena tahaka ny adala, fa tahaka ny hendry, ka hararaoty ny andro azo anaovan-tsoa, fa ratsy izao fiainana izao." — Efes. 5:15,16.
Mofon’aina:
Tsy hita hotombanana ny vidin'ny fotoana. Heverin'i Kristy ho sarobidy ny fotoana rehetra, ary toy izany no tokony hiheverantsika azy. (...) Tsy manana afa-tsy fotoana kely isika hiomanana ho amin'ny mandrakizay. (...) Izao isika no tokony hamolavola toetra amam-panahy ho amin'ny fiainana ho avy, ho amin'ny fiainana tsy ho lalovam-pahafatesana. Izao no fotoana iomanantsika ho amin'ny fitsarana farany.
Raha zara vao manomboka ny fiainany ny fianakavian'ny olombelona dia manomboka ny ho faty, ary ny asa tsy an-kijanona eto amin'izao tontolo izao dia miafara amin'ny zava-poana raha tsy nahazoana fahalalana marina momba ny fiainana mandrakizay. Ny olona izay mahatsapa ny fotoana ho toy ny andro fiasany dia hanomana ny tenany ho amin'ny fitoerana sy ny fiainana tsy holalovam-pahafatesana. Zava-tsoa ny nahaterahany.
Anarina isika hanararaotra ny fotoana. (...) Tsy azontsika antsoina hiverina na dia ny fotoana kely iray aza. Ny hany lalana azontsika hanonerana ny fotoanantsika, dia ny fanaovana ny be indrindra amin'izay atao amin'ny sisa, ho mpiara-miasa amin'Andriamanitra eo amin'ny drafitry ny fanavotana lehibe.
Hahita fiovana eo amin'ny toetra amam-panahy ny olona izay manao izany. Manjary zanak'Andriamanitra izy, anisan'ny fianakavian'ny Mpanjaka, zanaky ny Mpanjakan'ny lanitra. Mendrika hiara-mitoetra amin'ny anjely izy.
(...) Misy ireo izay mihevitra fa raha manome vola ho an'ny asan'i Kristy izy, dia izay ihany no angatahina hataony; ny fotoana sarobidy izay ahazoany manao asa manokana ho Azy, dia lasa fotsiny tsy ampiasaina. Nefa tombon-tsoa sy adidy ho an'izay rehetra salama sy matanjaka ny manao fanompoana sy asa ho an'Andriamanitra. (...) Tsy afaka hisolo ny fanoloran-tena ny fanomezam-bola.
Ny fotoana mety eo anoloantsika mba hilazana amin'ny fanahy mahantra iray ny tenin'ny fiainana dia mety tsy hiverina fanindroany intsony. Mety hiteny amin'io olona io Andriamanitra hoe: "Anio alina no halaina aminao ny fanahinao" - Lio. 12:20 ary noho ny tsirambina nataontsika dia mety tsy ho vonona izy. Amin’ny fomba ahoana no hanadiovantsika tena eo anatrehan’Andriamanitra amin’ny andro fitsarana lehibe? — HF, tt. 353,354.