"Fa raha misy efa afaka amin'ny fahalotoan'izao tontolo izao noho ny fahalalana tsara an'i Jesôsy Kristy, Tompo sy Mpamonjy, nefa voasingotr’izany indray ka resy, ny farany dia ratsy noho ny voalohany." - 2 Pet. 2:20.
Mofon’aina:
Nomena fahazavana lehibe ireo Mpanavao fivavahana, saingy maro tamin'izy ireo no nanjary diso hevitra noho ny fahazavana diso ny Soratra Masina. Namakivaky taonjato maro ireo fahadisoana ireo, saingy na efa antitra toy izany aza ireo, dia tsy manana ny "Izao no lazain 'i Jehôvah " manohana azy. Fa hoy Jehôvah : "ny nolazain'ny molotro tsy hovako." Noho ny famindrampon'ny Tompo lehibe, dia fahazavana lehibe lavitra aza no ataony mamirapiratra amin'izao andro farany izao. Nampitainy tamintsika ny hafany, izay manambara ny lalany sy mampiseho amintsika ny fahamarinana. Ao amin'i Kristy no misy ny loharanon'ny fahalalana rehetra. Ao Aminy no itoeran'ny fanantenantsika ny fiainana mandrakizay. Izy no Mpampianatra lehibe indrindra tsy mbola fahitan' izao tontolo izao hatrizay, ary raha maniry hampivelatra ny sain'ny ankizy sy ny tanora isika, handresy lahatra azy ireo araka izay azo atao mba ho tia ny Baiboly, dia aoka hampifantoka ny sainy amin'ny fahamarinana tsotra sy mazava (...). Ampirisiho izy ireo handalina ireo lohahevitra ireo, fa fahendrena sarobidy no ho vokatry ny ezaka ataony amin ' izany.
Ny fanehoan'Andriamanitra ny Tenany ao amin'i Jesôsy Kristy, dia manome lohahevitra lehibe hodinihina, ary raha ianarana, dia handranitra ny saina, hanandratra, ary hanatsara ny fahaiza-manao. Rehefa mianatra ireo lesona ireo ao amin'ny sekolin'i Kristy ny olombelona, ka manao izay anahafana an'i Kristy malemy fanahy sy tsy miavona am-po, dia handray ny lesona mahasoa indrindra — fa raha tsy hamasinina amin'ny alalan'ny fifandraisana velona amin'Andriamanitra ny saina dia tsy hanana ny fahaiza-manaony ambony indrindra. (...) Manjary tsinontsinona ny "izaho" rehefa mibanjina an'Andriamanitra sy i Jesôsy Kristy izay nirahiny. Tsy maintsy atao fototra iorenan'ny fianarana rehetra ny Baiboly. Aoka hianarantsika tsirairay ao amin' io bokin-desona nomen'Andriamanitra antsika io ny fepetran'ny famonjena ny fanahintsika; io mantsy no hany boky milaza amintsika izay tokony hatao mba hovonjena. Tsy izany ihany, fa azo anovozan-kery ho an'ny saina koa io boky io. - FCE, U. 450,451.