"Ary ny aminareo, dia ilay hosotra noraisinareo taminy no mitoetra ao aminareo, ka tsy mila hampianarin'olona hianareo; fa satria ny hosotra avy aminy no mampianatra anareo ny zavatra rehetra, sady marina fa tsy lainga izany, dia tomoera ao aminy hianareo, araka ny nampianarany anareo." - 1 Jao. 2:27.
Mofon’aina:
Andeha isika hino ny Teny. Izay mihinana ny mofo avy any an-danitra dia mahazo hanina isan'andro ary hahalala ny tian'izao teny izao hambara: "tsy mila hampianarin'olona hianareo." - 1 Jao. 2:27. (...)
Fototra mafy azontsika anorenana ny Tenin'Andriamanitra sarobidy. Rehefa manatona anao miaraka amin'ny tomban-keviny ny olona, dia lazao azy fa efa navelan'ilay Mpampianatra Lehibe ho anao ny Teniny, izay manana tombambidy tsy hay sandaina; lazao azy fa efa nirahiny Ilay Mpampahery avy amin'ny Anarany, dia ny Fanahy Masina. (Jao. 14:26; Jao. 6:51). (...)
Velarina eo anoloantsika ny hanim-py, izay azon'ny rehetra mino an'i Kristy ho Mpamonjin'ny tenany manokana hihinanana. (...)
Asaina mametraka izao fanon-taniana izao amin' ireo izay milaza fa mandray an'i Kristy ho Mpamonjin' ny tenany manokana aho: "Nahoana no ataonareo ankilabao ny tenin'Ilay Mpampianatra lehibe, ka manoratra amin'ny olombelona ianareo mba hampaherezany anareo? Nahoana no mitoky amin'ny fanam-pian'olombelona ianareo, kanefa manana ireo teny fikasana lehibe sady feno no tsara, manao hoe: "Izay mihinana ny nofoko sy misotro ny rako no mitoetra ao amiko, ary Izaho kosa ao aminy (...) Ity no mofo izay nidina avy tany an-danitra; tsy tahaka ny razana izay nihinana (mana), nefa maty ihany; fa izay mihinana ity mofo ity dia ho velona mandrakizay"? — Jao. 6:56,58. Mety ho faty tokoa izy ireo, kanefa ny fiainan'i Kristy ao anatiny dia fiainana mandrakizay, ary hatsangana amin'ny maty izy ireo any am-parany. "Ny fanahy no mahavelona; ny nofo tsy mahasoa na inona na inona; ny teny izay nolazaiko taminareo dia fanahy sy fiainana." - Jao. 6:63.
Ampianarin'ny tenin' Andriamanitra aho fa ho ahy sy ny zanak'Andriamanitra rehetra ny teny fikasany. Eo anoloantsika ny hanim-py; asaina isika hihinana ny Tenin'Andriamanitra, izay hanatanjaka ny hozatra ara-panahintsika. — MS 21, tt. 132,133.