"(...) Mifankatiava fatratra amin 'ny fo; (...) 'Fa ny nofo rehetra dia tahaka ny ahitra, ary izay mety ho voninahiny dia tahaka ny vonin'ny ahitra. Malazo ny ahitra, ka mihintsana ny voniny; Fa ny tenin'ny Tompo maharitra mandrakizay" - 1 Pet. 1:22-25.
Mofon’aina:
Manome antsika fahalalana momba ny drafi-pamonjena lehibe ny Baiboly masina, ary manoro antsika ny fomba ahazoan'ny tsirairay fiainana mandrakizay. Iza no mpanoratra io Boky io? I Jesôsy Kristy. Izy no Vavolombelona Marina, ary hoy Izy amin'ny olony: "Izaho manome azy fiainana mandrakizay, ka tsy ho very izy mandrakizay, ary tsy hisy handrombaka azy amin'ny tànako." — Jao. 10:28. Natao hampiseho antsika ny lalana mankany amin'i Kristy ny Baiboly, ary ao amin'i Kristy no miseho ny fiainana mandrakizay. Hoy i Jesôsy tamin'ny Jiosy sy ireo vahoaka nifanizina nanodidina Azy, "Diniho ny soratra masina." Nanana ny Teny ao amin'ny Testamenta Taloha ny Jiosy, saingy nafangarony tamin'ny hevitr'olombelona izany ka nanjary nanjavozavo ny fahamarinany, ary voafina ny sitrapon'Andriamanitra ho an'ny olombelona. Manao tahaka azy ireo koa ny mpampianatra ara-pivavahana amin'izao vanim-potoana izao.
Na dia nanana ny Soratra Masina izay nanambara an'i Kristy aza ny Jiosy, dia tsy nahafantatra an'i Kristy tao amin'ny Soratra Masina izy ireo; ary na dia manana ny Testamenta Taloha sy Vaovao aza isika, dia aolan'ny olona ankehitriny ny Soratra Masina mba hialana amin'ny fahamarinana; ary tahaka ny fomban'ny Fariseo. no ampianarany ny Soratra Masina, ka atakalony lovantsofina sy fitsipik'olombelona ny didin'Andriamanitra. (...)
Ny toritehin'i Kristy teo an-tendrombohitra dia nanohitra tanteraka ny fampianaran'ny mpanora-dalàna sy ny Fariseo mpanamarin-tena. Mpitsara masiaka, tsy miantra, tsy mamindra fo, ary tsy misy fitiavana no nanehoany an'Andriamanitra. (...) Na nilaza ho mahalala sy mivavaka amin'Andriamanitra marina sy velona aza izy ireo, dia tsy naneho Azy araka ny tokony ho izy velively; ary ny toetran'Andriamanitra, araka ny hita ao amin'ny Zanany, dia toy ny lohahevi-baovao, fanomezana vaovao ho an'izao tontolo izao. Nanao ny fomba rehetra i Kristy mba hamafana ny sary diso napetrak'i Satana tao an-tsain'ny olona, mba hiverina hatoky ny fitiavan'Andriamanitra indray ny olona. — FCE, tt. 308,309.