"Koa aoka ho fantatrao fa Jehôvah Andriamanitrao ihany no Andriamanitra, dia Andriamanitra mahatoky, Izay mitandrina fanekena sy famindrampo amin'izay tia Azy sy mitandrina ny didiny, hatramin'ny taranaka arivo mandimby." - Deo. 7:9.
Mofon’aina:
Diniho ny Soratra Masina, ry ray aman-dreny. Aoka ianareo tsy ho mpihaino fotsiny fa ho mpanatanteraka ny Teny. Araho ny fenitra napetrak'Andriamanitra eo amin'ny fanabeazana ny zanakao. Aoka izy ireo hahita fa miomana ho amin'ny Sabata ianao mandritra ireo andro iasana ao anatin'ny herinandro. Tokony hatao ny fiomanana rehetra, (...) mandritra ny andro fiasana; aoka hovitaina ao anatin'ny andro fiomanana ny fandrahoana ny sakafo rehetra ho an'ny Sabata. Azo atao izany, ary raha ataonao fitsipika izany dia azonao tanterahina. (...)
Hazavao amin'ny zanakao ny asa ataonao sy ny tanjona kendrena amin'izany, ary aoka izy ireo hanampy ny tenany sy ny ray aman-dreny amin'ny fanomanana ny fitandremana ny Sabata araka ny didy folo. Tariho ny zanakao hanao ny Sabata ho fahafinaretana, ho andro miavaka indrindra, ho masin'i Jehôvah, ary mendrika hohajaina. (...)
Ny Zoma, dia tokony efa voaoman' ny ankizy, eo ambany fanaraha-mason'ny renim-pianakaviana, ny fitafian'izy ireo, mba hahafahany miomana haingana tsy amim-pirotorotoana na amim-pikorontanana ary koa mba hialana amin'ny tenim-pahatezerana. (...)
Tokony hanokana ny fotoana rehetra azony atokana ho an'ny zanany ny ray aman-dreniny rehefa Sabata, mba hahatonga izany ho fahafinaretana. (...) Rehefa tsara ny andro, dia azon'ny ray aman-dreny atao ny mitondra ny zanany manao dia an-tongotra any an-tsaha na any anaty ala; amin'izany no iresahana aminy ny momba ireo hazo mijoalajoala sy ny kirihitra ary ny voninkazo, ary koa ampianarana azy fa Andriamanitra no Mpamorona ireo rehetra ireo. Ampianaro azy ireo avy eo ny antony isian'ny Sabata, mba ho fahatsiarovana ireo asa famoronana nataon'Andriamanitra. Nitsahatra Izy tamin'ny andro fahafito rehefa avy niasa tao anatin'ny henemana, ary notahiny sy nohamasininy izany andro nitsaharany izany. Tahaka izany no anomezana ny fampianarana mahasoa indrindra. - LUH, 14 Avrily 1909.