"Iza no manameloka? Kristy Jesosy no efa maty, eny, sady nitsangana tamin'ny maty koa ka mitoetra eo amin'ny tànana ankavanan’ Andriarnanitra ary mifona ho antsika." - Rôm. 8:34.
Mofon’aina:
Manao fanelanelanana ho anao manokana ny Tompo Jesosy (...). Averimbereno imbetsaka mandritra ny andro ny hoe: "Maty ho ahy i Jesosy. "Maty ho ahy i Jesosy. Hitany aho fa very, vonona ho amin'ny fandringanana, dia nafoiny hamonjena ahy ny ainy. Tsy mba tahaka ny an'ny olona lozabe ny fijeriny ny fanahy mangovitra mitalaho sy miankohoka eo an-tongony, ary tsy maintsy hanarina ahy Izy." Tonga Solovavan'ny olona izy. Asandrany ireo izay mino Azy ary vonona Izy handrotsaka ny harem-pitahiana avy ao amin'ny trano firaketany ho azy ireo araka izay ilainy. Tsy misy olona mahay mitahy ny olona namany; tsy mahaisotra na pentin'ota iray aza izy. Ny fahamendrehan'i Kristy sy ny fahamarinany ihany no if aina, kanefa dia omena antsika amin'ny fahafenoany tanteraka izany. Azontsika antsoina amin'ny fotoana rehetra Izy. Rehefa mitodika Aminy isika dia hoy Izy hoe: "Inty Aho". (...)
Nanambara ny Tenany ho Ilay mpanao fanelanelanana ho antsika i Kristy. Tiany ho fantatsika fa nanolo-tena ho Mpisolo antsika Izy. Napetrany ao amin' ilay lovia volamena fandoroana ditin-kazo manitra ny fahamendrehany (...) mba hifangaro amin'ny hanitry ny fahamendrehan'i Kristy ny vavak'ireo zanany malalany (...)
Ren'Andriamanitra Ray ny vavaka tsirairay ataon'ny zanany torotoro fo. Ny feontsika mitalaho eto amin'ity tany ity dia miara-miakatra amin'ny feon'Ilay Mpanelanelana antsika, Izay mifona ho antsika any an-danitra, feo izay ren'Andriamanitra Ray mandrakariva. Koa aoka hisandratra mandrakariva ho any amin'Andriamanitra ny vavaka ataontsika. Aoka tsy hatao amin'ny anaran'ny olombelona izany, fa amin'ny anaran'Ilay maty nisolo antsika sy Mpiaro antsika. Nomen'i Kristy hampiasaintsika ny anarany. (...)
Mandray tsara anao toy ny fandraisany ny sakaizany i Jesosy. (...) Hoy Izy: "Amin 'izany andro izany dia hangataka amin 'ny anarako hianareo; ary tsy milaza aminareo Aho fa Izaho no hangataka amin'ny Ray ho anareo; fa ny Ray dia tia anareo satria hianareo efa tia Ahy, ary efa nino fa nivoaka avy tamin'ny Ray Aho." — Jao. 16:26,27. —L, 92, 1895.