«Koa lazaiko aminareo: Na inona na inona tononinareo amin'ny fivavahana sy angatahinareo, dia minoa fa efa nandray hianareo, dia ho azonareo izany.» - Mar. 11:24.
Mofon’aina:
Koa raha hianareo, na dia ratsy aza, mahalala hanome zava-tsoa ho anrny zanakareo, tsy mainka va ny Rainareo Izay any an-danitra no hanome zava-tsoa ho an'izay mangataka aminy?» - Mat. 7:11. Omen'Andriamanitra maimaimpoana ho antsika izany. Indrisy fa malemy ny finoantsika ka tsy mahazo izany teny fikasany tsara sy be voninahitra izany! (...) Manana ny fahendrena faratampony sy hery tsitoha Izy, ary hanome malalaka ho an'izay rehetra mangataka amim-pinoana. Be famindram-po, malemy fanahy, manam-paharetana, ary be fitiavana lavitra noho ny ray aman-dreny eto an-tany Izy.
Voatokana ho amin'ny tanjona ambony sy masina ny mpino an'i Kristy. (...) Voantso araka ny sitrapon' Andriamanitra, natokana tamin'ny alalan'ny fahasoavany, notafiana ny fahamarinan'i Kristy, nofenoina ny Fanahy Masina, ary manolotra fanatitra amin'ny fo torotoro sy mangorakoraka ny tena mpino marina, koa dia solontenan'ny Mpanavotra tokoa izy.
Mahafaly an'Andriamanitra ny mpivavaka toy izany. Ataony mamira-piratra ao amin' ireo efitrefitry ny saina sy ao amin'ny tempolin'ny fanahy ny fahazavany raha toa ka miditra ao amin'ny efitranony ny olona, miaraka amin'ny tsy fananany fahendrena, ka mivavaka sy mangataka fahendrena amin'llay manome malalaka ny olona rehetra sady tsy mandatsa. Izao no teny fikasana: «homena azy izany. Nefa aoka hangataka amin'ny finoana izy ka tsy hiahanahana akory; fa izay miahanahana dia toy ny alon-dranomasina entininy rivotra ka atopatopany.» - Jak. 1:5,6. (...)
Ny zavatra rehetra dia hain'ny mino. Tsy misy ho diso fanantenana izay rehetra manatona ny Tompo amin'ny fo tsotra. Mahagaga tokoa ny fahafahantsika mivavaka sady misy mihaino! Olona mety maty, tsy mendrika sy be fahadisoana no manana fahafahana maneho ny fangatahany amin'Andriamanitra!
Inona moa no fahefana tadiavin'ny olona mihoatra noho ny hoe mifandray amin'Ilay Andriamanitra mandrakizay? Manana tombontsoa hiresaka amin'ny Mpamorona azy ny olombelona malemy sy mpanota. Tafapaka any amin'ny seza fiandrianan'Ilay Mpanjakan'izao rehetra izao ny teny aloaky ny vavantsika. Mamboraka ny hetahetam-ponts i ka ao an'efitranontsika isika, ary avy eo, miara-mandeha amin'Andriamanitra tahaka an'i Enoka. — RH, 30 Oktôbra 1900.