"Raha mihevitra sy miresaka bebe kokoa ny amin'i Jesôsy isika, ary kelikely kokoa ny amin'ny tenantsika, dia hahazo Kristy mifanatrika be lavitra noho izao isika." - DHK, t. 117 (ed. 2018) "Raha mandray torohevitra avy amin'ny fisalasalana sy ny tahotsika isika, na mitady hanazava ny zavatra rehetra izay maizimaizina amintsika vao hino, dia vao mainka hitombo sy hihalalina ny fahasahiranan-tsaina mahazo antsika. Nefa raha manatona an'Andriamanitra isika, ka mahatsiaro ny tenantsika ho tsy manan-kery, sady tsy mahavita tena, dia araka ny tena toetsika tokoa; ary amin'ny finoana mietry tena sady matoky no milaza izay ilaintsika Aminy Izay manam-pahalalana tsy voafetra; ka mahita sy manapaka ny zavatra ary rehetra amin'ny teniny sy ny sitrapony, dia Izy no mahay sady mety mihaino ny fitarainantsika, ka hamela ny mazava hamirapiratra ao am-pontsika." - DHK, t. 111. np. "Amin'ny elatry ny fiderana no hahazoan'ny fanahy hiakatra ho eo akaikikaikin'ny lavitra kokoa. Ankalazaina amin'ny tononkira sy ny mozika ao amin'ny lapany ao ambony Andriamanitra; ary amin'ny ampisehoantsika ny fisaorantsika no anatonantsika kokoa ny fotoam-pivavahana ataon'ireo marobe any an-danitra. (...) Koa dia aoka isika hankeo anoloan'ny Mpamonjintsika amin'ny fifaliana feno fanajana mitondra ny 'fisaorana sy ny feo fiderana'- Isa. 51:3." - DHK, t. 119.
FANONTANIANA hifanakalozan-kevitra
1. lnona amin'ireo hevitra voalaza etsy ambony no mahakasika ny fonao indrindra? lnona no hitanao fa sarotra tanterahina indrindra?
2. lnona koa ireo lesona hafa azontsika ianarana avy amin'ny fiainam-bavaky ny olona ao amin'ny Baiboly? (Jereo ny Ezra 10:1; 2 Mpanj. 13:4; Jona 4:2,3; Hab. 3:1,2; 2 Mpanj. 19:14-19; Jer. 32:16-25; Neh. 1:4-11; 1 Mpanj. 8:22-54, raha tsy hitanisa afa-tsy ireo isika).
3. lnona no anjara asan'ny fifadian-kanina miaraka amin'ny vavaka?
4. Misy zava-baovao tianao hovana na hampidirina ao amin`ny fiainam-bavakao ve, taorian'ny lesona nandritra ity herinandro ity? Nahoana moa raha tanterahina izany fanovana izany?
Daty
Zoma 15 May 2026