"Ary aza miray amin'ny asan'ny maizina tsy mahavoka-tsoa, fa aleo mananatra izany." - Efes. 5:11
Mofon’aina:
Maro amin'ireo mitonona ho Kristianina no tahaka ny voaloboka (...) manakambana ny rantsany amin'ny fakany sy ny loto izay sendra azy eny an-dalana. Ho azy ireny izao hafatra izao: "Koa mivoaha eo aminy hianareo, ka misaraha aminy hoy Jehovah. Ary aza manendry izay zavatra tsy madio; ary Izaho dia handray anareo. Ary ho Rainareo Aho, ary hianareo ho zanako-lahy sy ho zanako-vavy, hoy Jehovah Tsitoha.' - 2 Kôr. 6:17,18.
Misy fepetra tsy maintsy tanterahina raha tiana ny handray fitahiana sy voninahitra avy amin'Andriamanitra. Tsy maintsy misaraka amin'izao tontolo izao isika, ary mandà tsy hikasika izay mety hanaisotra ny fitiavantsika amm' Andriamanitra. Andriamanitra no manana ny zo voalohany sy ambony indrindra amin'ny vahoakany. Apetraho amin'Andriamanitra sy amin'ny zavatry ny lanitra ny fitiavanao. (...) Anarina isika mba tsy hikasika izay maloto, satria raha mikasika izany isika dia haloto ihany koa. (...) "Fa inona no iraisan'ny fahamarinana sy ny fahotana? Ary inona no iombonan 'ny mazava sy ny maizina? Ary inona no ifànarahan 'i Kristy sy Beliala?" - and. 14,15. Irin'Andriamanitra sy i Kristy ary ny tafika any an-danitra ny hahalalan'ny olona fa raha miray amin'ny ratsy izy, dia ho ratsy ihany koa. (...)
Hita taratra eo amin'ny asantsika rehetra ny fanandramantsika ara-pivavahana. Raha miorina amin' Andriamanitra ny fanandramantsika, raha toa isika manandrana isan'andro ny herin'ilay tontolo ho avy sy manana firaisana amin'ny Fanahy, raha toa fikirintsika mafy kokoa isan'andro ilay fiainana any ambony, dia hiorina ao anatintsika ny fitsipika masina sy manandratra. Ary ho toy ny zavatra voajanahary amintsika ny mitady fahadiovana sy fahamasinana ary fisarahana amin'izao tontolo izao, toy ny anjelin'ny voninahitra izay manatanteraka ny asam-pitiavana ampanaovina azy. - RH, 2 Janoary 1900.
Aoka ny fanolorantsika tena ho an'Andriamanitra ho fitsipika velona, mifamatotra amin'ny fiainana sy fitarihana feno fandavan-tena sy fahafoizan-tena. Izany no tokony ho fototry ny fisainantsika rehetra sy loharano ipoiran'ny asantsika rehetra. Hanandratra antsika ho ambonin'izao tontolo izao izany ary hampisaraka antsika amin'ny hery miasa mangina mandoto avy aminy. - RH, 2 Janoary 1900.