"Aleo ho tsara laza toy izay ho be harena, ary tsara ny fitia noho ny volafotsy sy ny lamena." - Ohab. 22:1
Mofon’aina:
Mety maniry laza ny olona. (...) Ho an'ny sasany, ny fananana trano sy tany ary vola be, izay mahatonga azy ho lehibe araka ny fanombanan'izao tontolo izao, no fara tampon'ny faniriany. Iriny ny hahatratra toerana ahafahany mijery ny mahantra amim-piheverana fa ambony izy. Ireo rehetra ireo dia manorina eo ambonin'ny fasika, ary hirodana tampoka ny tranony. Ny toerana ambony dia tsy tena fahalehibiazana marina. Zava-poana izay tsy mampitombo ny lanjan'ny fanahy. Ny hany mendrika hokatsahina dia ny fahalehibiazan'ny fanahy eo imason'ny lanitra. (...) Ny hany ahafahana mandrefy ny tombambidintsika dia ny lanjan'ny Aina izay natolotra mba hamonjena izay rehetra mandray izany.
Ny olona rehetra dia hahalala ny tena tombambidiny rehefa tonga mpiara-miasa amin'i Kristy izy ka manao ny asa nataon'i Kristy (...) ary manatanteraka ny iraka nampanaovin'ilay Avo Indrindra. (... ) Ny iraka nomena ny mpianatra dia ho an'izay rehetra mifandray amin'i Kristy. Tokony hanao ny sorona rehetra izy ireo mba hahazoany fifaliana eo am-pahitana fanahy maro voavonjy izay very tsy manana an'i Kristy. (...)
Ny voninahitra ambony indrindra azo omena ny olombelona, na tanora izy na antitra, na manan-karena na mahantra, dia ny fahazoana manandratra ireo ampahorina sy mampahery ny saina ketraka. Feno fahoriana izao tontolo izao. Mandehana, torio amin'ny mahantra ny filazantsara; sitrano ny marary. Izany no asa mifandray amin'ny hafatry ny filazantsara. (...) Ny mpiara-miasa amin'Andriamanitra dia tokony hameno ny toerana misy azy eto amin'izao tontolo izao amin'ny fitiavan' i Jesosy. (...) Aseho amin'ny asa ny fitiavana an'i Kristy ao am-po. (...)
Ny finoana marina sy ny fitiavana tena izy no tena harena. Ireo no mahatanteraka ny toetra ao amin'i Kristy. Raha misy finoana bebe kokoa — finoana tsotra sy matoky an' i Jesosy — dia hisy fitiavana madio, izay volamena amin'ny toetra kristianina. –Ms 61, 1898.