« Mahereza, ary aoka hatanjaka ny fonareo, dia hianareo rehetra izay manantena an’i Jehovah. » Sal. 31:24.
Mofon’aina:
Na ny Kristianina manana fanandramana maro aza dia iharan’ireo fanahiana sy ireo fisalasalana ratsy indrindra. (...) Tsy tokony hihevitra ianao fa tsy misy fanantenana ny aminao momba ireo fakam-panahy ireo. (...) Manantenà an’Andriamanitra, matokia Azy ary mitoera ao amin’ny teny fikasany.
Hidio ny varavaran’ny fonao rehefa tonga miaraka amin’ireo fanahiany sy ireo tsy finoany ny devoly. Akimpio ny masonao mba tsy hahatavela anao eo amin’ny aloky ny helo. Asandrato ny maso mba hahafahany mibanjina ny zavatra maharitra mandrakizay ka hanananao tanjaka isan’ora. Sarobidy noho ny volamena ny fitsapana ny finoanao. (...) Hahatonga anao ho sahy hiady ny adin’ny Tompo izany. (...)
Mifandray amin’ireo rehetra maniry ny hifandray aminy i Satana. Raha azony atao ny mahazo ireo izay nanana fanandramana ara-pivavahana dia izy ireo no mpiasa mahomby indrindra hanatrarana ireo olona ireo sy ny fanahiny amin’ny alalan’ny tsy finoana. Tsy azonao atao ny hamela ny fanahiana hitoetra ao an-tsainao. Aza manome fahafinaretana ny devoly amin’ny fitantarana ireo enta-mavesatra entinao. Isaky ny manao izany ianao dia mifaly i Satana fa azon’ny fanahiny atao ny mifehy anao ka tsy mijery an’i Jesôsy Kristy Mpanavotra anao intsony ianao. (...)
Mila maneho Ilay niantso antsika avy amin’ny haizina ho amin’ny fahazavany mahagaga isika. Amin’ny finoana velona no itsaharantsika ao amin’izany fahazavana izany. Amin’ny finoana velona no hifaliantsika isan’andro ny amin’izany fahazavana izany. Tsy tokony hiresaka ny amin’ny fanahiantsika sy ny fizahan-toetra mahazo antsika isika satria mitombo izany isaky ny ataontsika anton- dresaka. Isaky ny miresaka izany isika dia mandresy i Satana; saingy rehefa miteny isika hoe: “Apetrako Aminy ny fiandrasana ny fanahiko, toy ny amin’ny vavolombelona mahatoky” dia mijoro ho vavolombelona isika fa nanolo-tena tanteraka ho an’i Jesôsy Kristy ary noho izany dia manome antsika ny fahazavana Andriamanitra ary mifaly ao Aminy isika.
Ny fanahy izay tia an’Andriamanitra dia misandratra ambonin’ny zavon’ny fisalasalana; manana fanandramana mamiratra, mivelatra, lalina, velona izany ary tonga malemy fanahy sy manahaka an’i Kristy. Mifamatotra amin’Andriamanitra ny fanahiny, miara-miafina amin’i Kristy ao amin’Andriamanitra. – OHC, t. 86.