"Ary aoka ho tahaka izany koa hianareo, ka ny tenanareo dia ataovy ho efa maty ny amin'ny ota, fa velona ho an 'Andriamanitra ao amin'i Kristy Jesôsy. Koa aza avela ny ota hanjaka amin'ny tenanareo mety maty hanarahanareo ny filany." — Rôm. 6:11,12.
Mofon’aina:
Misy mihevitra fa ny ota dia toy ny zavatra maivamaivana ka tsy manana fiarovan-tena amin'ny fampanaranana izany na amin'ny vokatr ' izany izy ireo. (...) Raha heverinao mandritra ny fotoana fohy fa manamaivamaivana ny fahotana Andriamanitra na manome fanafahana manokana anao mba hahafahanao manohy manota ary tsy ory ny fanahinao noho izany, dia eo ambany fangejan'ny fitaka mahatsiravin' i Satana ianao. Izay rehetra mandika ny lalana marin'i Jehôvah an-tsitrapo dia mametraka ny fanahiny ho eo amin'ny famitahan'i Satana.
Rehefa verinao ny fahitsiana araka ny feon'ny fieritreretanao dia tonga sahan'adin'i Satana ny fanahinao; misy fanahiana sy tahotra ampy hamotika ny herinao sy hanosika anao ho amin'ny fahakiviana ao aminao. (...) fa tsy fahotana ny fakam-panahy. Tsarovy fa, na inona na inona toe-javatra ametrahana ny olona iray, dia tsy misy afaka hampahalemy ny fanahiny raha tsy mbola milefitra amin' ilay fakam-panahy izy ka mitahiry ny fahatokiany. Eo am-pelatananao ireo tombontsoa lehibe indrindra ho anao manokana. Tsy misy afaka manimba izany raha tsy amin'ny fanekenao. Tsy afaka handratra anao ireo legionan'i Satana raha tsy vohanao ny fanahinao ho amin'ny asa sy ny zana-tsipikan'i Satana. Tsy ho ringana ianao raha tsy efa manaiky izany. Raha tsy misy halotoam-pisainana ao aminao dia tsy afaka handoto anao ireo fahalotoana rehetra manodidina anao.
Na zava-drehetra ho antsika na tsy misy heviny amintsika ny fiainana mandrakizay. Ireo izay miezaka mafy amim-paharetana sy amim-pahavitrihana tsy mety sasatra amin'ny faniriana mafy mifanaraka amin'ny tombambidin'ny zavatra arahiny dia hahazo izany fiainana izay mifanaraka amin'ny fiainan' Andriamanitra izany. (...)
Manoloana antsika ny ohatra nasehon'i Adama sy i Eva, ary ny vokatry ny fandikan-dalana nataony dia tokony hitarika ny fanahintsika tsirairay hiala amin'ny fahotana, hankahala izany amin'ny maha-ratsy azy, ary hahatsapa eo anatrehan'ny fahoriana ateraky ny fahotana fa tsara kokoa ny miaritra ny fahaverezan'ny zava-drehetra toy izay hiala amin'ny kely indrindra amin'ny didin'Andriamanitra. — OHC, t. 94.