"Ary hoy koa Jesosy tamin'izy rehetra: Raha misy ta-hanaraka Ahy, aoka izy handa ny tenany, dia hitondra ny hazo fijaliany isan-andro ka hanaraka Ahy."- Lio. 9:23
Mofon’aina:
IKristy dia manambara fa tahaka ny niainany no tokony hiainantsika koa. (...) Mandritra ny fiainana dia maro ny fotoana ahafahantsika manompo. (...) Betsaka no azontsika atao ho an'ny Tompo raha mampiasa araka ny tokony ho izy ny talentan'ny fiteny isika. (...) Ny vola, ny hery miasa mangina, ny fahaiza-miresaka, ny fotoana ary ny hery – ireo rehetra ireo dia fanomezana nankinina tamintsika mba hahatonga antsika hitondra soa bebe kokoa ho an'ireo manodidina antsika sy hanome voninahitra bebe kokoa hay Mpamorona antsika.
Maro no mihevitra fa tombontsoa ny mitsidika ireo toerana niainan'i Kristy teto an-tany, (...) nefa tsy ilaintsika ny handeha any Palestina vao afaka hanaraka ny dian-tongotr'i Jesosy isika. Eo anilan'ny fandrian'ny marary no hahitantsika ny dian-tongony, ao an-tranon'ny mahantra, eny an-dalana feno olona any an-tanan-dehibe, ary any amin'ny toerana rehetra misy fo mitady fiononana koa.- RH, 29 Febroary 29 1912.
Tahaka ny zava-maitso velombelona tsara vokatry ny sakeli-drano nandalo
teo anilany, tahaka izany koa no ahitana an'i Kristy eo amin' ireo asam-pamindrampo nanamarika ny lalany isaky ny indray mandingana. Na taiza na taiza nandehanany, dia niverina tamin'ny laoniny ny fahasalaman'ny marary, ary fifaliana no hita teo amin'izay rehetra nolalovany. Nifaly tamin'ny fanatrehany ny jamba sy ny marenina. (...)- RH, 25 Avrily 1912.
An-tapitrisa maro ireo fanahy efa ho faty, voafatotry ny rojon'ny tsy fahalalana sy ny fahotana, no tsy mbola nandre firy ny amin'ny fitiavan' i Kristy azy. Raha nifamadika ny toerana misy azy ireo sy ny antsika, inona no ho nirintsika hataony amintsika? Izany rehetra izany dia adidy masina tokony hataontsika ho azy ireo, raha mbola manana hery isika. Izao no fitsipi-piainan'i Kristy, izay hitsarana ny tsirairay eo amin'ny fitsarana: "Koa amin 'izany na inona na inona tianareo hataon'ny olona aminareo, dia mba ataovy aminy kosa tahaka izany." - Mat. 7:12 - RH, 29 Febroary 1912.